Prezıdent Jarlyǵymen Abaı, Jetisý jáne Ulytaý oblystary quryldy
2022 jylǵy 4 mamyr 11:10

Prezıdent Jarlyǵymen Abaı, Jetisý jáne Ulytaý oblystary quryldy

NUR-SULTAN. QazAqparat - Prezıdent Jarlyǵymen elimizde úsh jańa oblys quryldy. QazAqparat Prezıdenttiń tıisti Jarlyǵyn jarııalaıdy.

Qazaqstan Respýblıkasynyń ákimshilik-aýmaqtyq qurylysynyń keıbir máseleleri týraly

«Qazaqstan Respýblıkasynyń ákimshilik-aýmaqtyq qurylysy týraly» Qazaqstan Respýblıkasy Zańynyń 9-babyna sáıkes QAÝLY ETEMІN:

1. Almaty oblysynyń ákimshilik ortalyǵy Taldyqorǵan qalasynan Qonaev qalasyna kóshirilsin.

2. Mynalar:

1) Shyǵys Qazaqstan oblysynyń quramynan Aqsýat, Abaı, Aıagóz, Besqaraǵaı, Borodýlıha, Jarma, Úrjar, Kókpekti aýdandaryn, Semeı jáne Kýrchatov qalalaryn bólý jolymen ákimshilik ortalyǵy Semeı qalasynda ornalasatyn Abaı oblysy;

2) Almaty oblysynyń quramynan Aqsý, Alakól, Eskeldi, Qaratal, Kerbulaq, Kóksý, Panfılov, Sarqan aýdandaryn, Taldyqorǵan jáne Tekeli qalalaryn bólý jolymen ákimshilik ortalyǵy Taldyqorǵan qalasynda ornalasatyn Jetisý oblysy;

3) Qaraǵandy oblysynyń quramynan Jańaarqa, Ulytaý aýdandaryn, Jezqazǵan, Qarajal jáne Sátbaev qalalaryn bólý jolymen ákimshilik ortalyǵy Jezqazǵan qalasynda ornalasatyn Ulytaý oblysy qurylsyn.

3. Almaty oblysynyń jergilikti ókildi jáne atqarýshy organdary, sondaı-aq ortalyq memlekettik organdardyń aýmaqtyq bólimsheleri men vedomstvolyq baǵynysty mekemeleri Qonaev qalasyna kóshirilgenge deıin Taldyqorǵan qalasynda ornalasady dep belgilensin.

4. Qazaqstan Respýblıkasynyń Úkimeti Qazaqstan Respýblıkasynyń Joǵarǵy Sotymen, Qazaqstan Respýblıkasynyń Joǵary Sot Keńesimen, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdarmen birlesip, bir aı merzimde uıymdastyrý
is-sharalarynyń josparyn (jol kartasyn) bekitsin jáne osy Jarlyqty iske asyrý jóninde ózge de sharalardy qabyldasyn.

5. Ortalyq memlekettik organdar, Abaı, Jetisý, Ulytaý oblystarynyń, sondaı-aq Shyǵys Qazaqstan, Almaty, Qaraǵandy oblystarynyń jergilikti ókildi jáne atqarýshy organdary ortalyq memlekettik organdardyń tıisti aýmaqtyq bólimsheleriniń, jergilikti ókildi jáne atqarýshy organdar men uıymdardyń irkilissiz jáne tıimdi jumys isteýin qamtamasyz etý jóninde sharalardy qabyldasyn.

6. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

7. Osy Jarlyq 2022 jylǵy 8 maýsymnan bastap qoldanysqa engiziledi jáne resmı jarııalanýǵa tıis.

Qazaqstan Respýblıkasynyń Prezıdenti Q.Toqaev

Nur-Sultan, Aqorda, 2022 jylǵy 3 mamyr

№ 887


Seriktester jańalyqtary

Jańalyqtar

Úrdis

MURAǴAT