Prezıdent járdemaqy alý úshin alaıaqtyqqa barǵandardy qatań jazalaýdy tapsyrdy

NUR-SULTAN. QazAqparat – QR Prezıdenti Qasym-Jomart Toqaev ataýly áleýmettik kómektegi aǵdaı týraly pikir bildirdi, dep habarlaıdy QazAqparat tilshisi.

«Ataýly áleýmettik kómek boıynsha teris pıǵyldy áreketter tutas elge tarady. Ótirik ajyrasý, jumystan shyǵý, óz múlkin basqaǵa jazý arqyly tabysyn azaıtyp kórsetý, malyn soıyp tastaý dep kete beredi. Jobany tıimsiz júzege asyrý halyqtyń keı bóliginiń masyldyq kúıge túsýine ákep soqty. Bul – bizdiń shala jumysymyz», - dedi Memleket basshysy Úkimettiń keńeıtilgen otyrysynda.

Osyǵan baılanysty, Qasym-Jomart Toqaev shyn muqtajdarǵa ǵana kómektesý úshin Úkimettiń naqty ári ashyq protsedýralar ornatýy qajettigin aıtty. 

«Ataýly kómek bólýdi qatań baqylaýǵa alyp, kez kelgen alaıaqtyq pen jemqorlyqty qatań jazalaý kerek. Úkimet pen ákimder mundaı faktilerdiń aldyn alyp, AÁK tólemderin ákimshiliktendirýdi retke keltirýi tıis. Kómek ataýly túrde kórsetilýi qajet», - dep atap ótti Q. Toqaev.