Prezıdent TRK túsirgen «Halyqqa qamqorlyq» atty derekti fılm jaryq kórdi
2022 jylǵy 11 sáýir 01:32

Prezıdent TRK túsirgen «Halyqqa qamqorlyq» atty derekti fılm jaryq kórdi

NUR-SULTAN. QazAqparat – «Qazaqstan halqyna» qorynyń qurylǵanyna úsh aı boldy. «Halyqqa qamqorlyq» atty derekti fılm osy ýaqyt ishinde qordyń jumysy qalaı jolǵa qoıylǵanyn baıandaıdy, dep habarlaıdy QazAqparat tilshisi.

«Bul fılm ıyǵyna túsken aýyrtpalyqty qabaǵyn shytpaı arqalaǵan ardaqty azamattar, olarǵa aýyr kezde qol ushyn sozyp kómektesken jomart jandar jaıynda», - dep bastalady týyndy.

Kórermen fılm barysynda osy qordyń qurylýyna túrtki bolǵan qańtar qasiretin taǵy bir esine alady.

Desanttyq-shabýyldaý batalonynyń komandıri Erkebulan Qarsybekovtiń jubaıy sol mazasyz kúnderdi áli tolqýsyz eske ala almaıdy. 5 qańtarda jumysyna ketken joldasy araǵa 18 kún salyp qana úıine oralǵan edi.

Dál solaı qyzmetine alańsyz ketip, oralmaı qalǵan ulandar da bar. Resmı derek boıynsha, qańtar oqıǵasy kezinde 230 adam qaza taýyp, myńdaǵan adam jaraqattanǵan. Qordyń bir baǵyty – osy syn saǵatta qoǵamdyq tártipti kúzetip júrip ajal qushqan áskerıler men saqshylardyń otbasyna kómek qolyn sozý.

«Qazaqstan halqyna» qory densaýlyq saqtaý, bilim berý jáne áleýmettik qoldaý salasyndaǵy eń kúrdeli máselelerdi sheshýge baǵyttalǵan. Fılmge arqaý bolǵan jandardyń taǵdyryna, basyna túsken synaqqa qarap otyryp, qordyń qandaı jaýapty mıssııany arqalaıtynyn túsinýge bolady. Mysaly, Atyraý qalasyndaǵy úsh balasy birdeı aýyr dertke shaldyqqan otbasynyń qaısarlyǵy adamdy oılantpaı qoımaıdy. Abyroı bolǵanda, mundaı aýrýdy irgedegi Ózbekstan mamandary emdeıtin bolyp shyqqan.

«Biz ár úsh aı saıyn halyqtan aqsha jınaımyz. Halyqtyń kómegimen, aǵaıyn-týmanyń kómegimen 100 teńgeden, 200 teńgeden jınalǵan qarjymen, ózimizdiń jınaǵan qarjymyzben sol jaqqa baryp-kelip júrdik. Buryn bir saparǵa 500-600 myń ketetin. Aıa qyzymyz poıyzǵa shydamaıtyn bolǵandyqtan, ushaqpen qatynaımyz», - deıdi erekshe balalardyń anasy Mıra Hadısova.

Prezıdent Qasym-Jomart Toqaev bul qordy qurý týraly bastamany alǵash kótergen kezde arfandyq aýrýǵa shaldyqqan balalarǵa kómek kórsetilýi kerektigin aıryqsha ataǵan bolatyn.

«Biz arfandyq aýrýlarmen aýyratyn, ıaǵnı sırek kezdesetin syrqaty bar naýqas balalarǵa kómek kórsetý úshin kóp jumys istedik dep oılaımyn. Osyndaı balalardy dári-dármekpen qamtamasyz etý úshin 4 mlrd teńge tóledik. Densaýlyq saqtaý mınıstrligimen, jergilikti atqarýshy organdarmen birge taǵy da dári-dármekpen qamtamasyz etýge 14,7 mlrd teńge tóleý kerek dep sheshtik», - deıdi qordyń basqarma tóraǵasy Bolat Jámishev.

Taǵy bir atyraýlyq Musa esimdi bir jasar balanyń júregine qajet otany AQSh, Germanııa, Izraıl jáne Ońtústik Koreıa elderiniń mamandary ǵana jasaı alady eken. Sultashevter otbasynyń endigi jalǵyz úmiti osy «Qazaqstan halqyna» qorynda.

Bolat Jámishevtiń aıtýyna qaraǵanda, qor qurylǵannan beri shetelde emdelýge kómek surap 300-den astam ótinish túsken. Qor basshysy sondaı ótinishterdiń negizinde eki balany Ońtústik Koreıa men Reseı astanasynda júrekke ota jasatýǵa jibergeli otyrǵandaryn mysal etip keltirdi.

Aýtızmge shaldyqqan balasyn emdeý jolynda tynbaı eńbektenip júrip salanyń myqty mamanyna aınalǵan Gúlbaram Ermuhanovanyń basyndaǵy oqıǵa da derekti fılmge arqaý bolǵan.

«Qazaqstan halqyna» qorynyń qamqorlyǵyna ilikkenderdiń biri – Qaraǵandy oblysy Shet aýdany Aqsý-Aıýly aýylynda turatyn Aldabergenovter otbasy. Osy úıdiń jasy ekige de tolmaǵan Aısezim atty sábıi «bulshyqet artrofııasy» deıtin sırek kezdesetin dertke shaldyqqan. Anasynyń aıtýynsha, tili «áke», «ana» dep aıtýǵa kelgenimen, aıaqtan turý, etpettep jatyp, basyn kóterý ázirge arman ǵana. Osyndaı aýyr dertti baıaýlatatyn dáriniń quny – 1 mlrd teńge. Onyń ózinde jasy ekige tolyp, salmaǵy 13,5 kelige jetkenshe salynyp úlgerýi kerek. Mejeli shaq jaqyndaǵan saıyn ata-ananyń ýaıymy qalyńdaı bergen. Osyndaı sátte «Qazaqstan halqyna» qorynan «Balalaryńyzǵa kómek beriletin boldy» degen aqjoltaı habar jetip, jankeshti jandardyń úmitin qaıta oıatypty.

«Aqpan aıynyń sońynda «Qazaqstan halqyna» qoǵamdyq qorynyń qamqorshylyq keńesi qańtar oqıǵasy kezinde qaza bolǵan azamattardyń jaqyndaryna 7 mln teńgeden járdemaqy tóleý týraly sheshim qabyldady. El tynyshtyǵyn qorǵaımyz dep aýyr jaraqat alǵan kúsh qurylymy qyzmetkerleri men qańǵyǵan oqtan japa shekken balalardyń ata-analaryna 3 mln teńgeden bólinetin boldy. El basyna kún týǵanda qurylǵan qoǵamdyq qor áli de kómekke muqtaj talaı janǵa qamqorshy bolýǵa daıyn» dep aıaqtalady fılm.


Jańalyqtar

Úrdis

MURAǴAT