Prezıdent: Shekaralyq aımaqtarda logıstıkalyq ortalyqtar salýdy jalǵastyramyz
2022 jylǵy 25 qańtar 15:30

Prezıdent: Shekaralyq aımaqtarda logıstıkalyq ortalyqtar salýdy jalǵastyramyz

NUR-SULTAN. QazAqparat – Qazaqstan tarapy Qytaı men Ortalyq Azııa elderiniń arasyndaǵy shekaralyq aımaqtarda logıstıkalyq ortalyqtar salýdy jalǵastyrady. Bul týraly QR Prezıdenti Qasym-Jomart Toqaev «Ortalyq Azııa – QHR» sammıtinde aıtty, dep habarlaıdy QazAqparat.

«Birlesken kásiporyndar sany artyp keledi. Ónerkásipte, energetıkada, mashına jasaýda, aýyl sharýashylyǵynda jáne basqa da salalarda zákirlik jobalar iske asyrylyp jatyr. Birtindep saýda kedergileri de alynyp keledi, ótkizýdiń zamanaýı beketteri ashylyp jatyr. Qosymsha áýe reısteri men temirjol marshrýttary ashylyp jatyr», - dedi Memleket basshysy.

Sondaı-aq, ol Qazaqstan kedendik shekarada tártip ornatý boıynsha túbegeıli jumystardy bastaǵanyn atady.

«Sonyń ishinde zańsyz shemalar quryp, bıznestiń aldyna kedergiler tosqan josyqsyz kásipkerlermen kúresti kúsheıtemiz. Quqyqqa qarsy mundaı árekettermen kúres jýyq arada nátıje beretinine senimdimin. Qazaqstanǵa kiretin ımport pen úshinshi elderge baǵyttalǵan tasymaldar eshqandaı da zardap shekpeıtinine sendirgim keledi. Úkimet pen quqyq qorǵaý organdaryna tıisti tapsyrmalar berdim. Shekaralyq aımaqtarda biz kóterme-taratý jáne agro-logıstıkalyq ortalyqtary bar ınfraqurylym qurýdy jalǵastyra beremiz. Osynyń bári óńirishilik saýdanyń ósýine jaǵymdy yqpal etýde», - dedi Qasym-Jomart Toqaev.

Aıta keteıik, Memleket basshysy Qasym-Jomart Toqaev «Ortalyq Azııa – QHR» sammıtine qatysýda.

Sammıtke QHR Tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japparov, Túrikmenstan Prezıdenti Gýrbangýly Berdimuhamedov, Tájikstan Prezıdenti Emomalı Rahmon beınekonferentsııa rejıminde qatysyp otyr.


Jańalyqtar

MURAǴAT