Jańalyqtar  >

Prezıdent saılaýy: Toqaevty qoldaý jónindegi halyqtyq koalıtsııa qurylady

2022 jylǵy 6 qazan, 12:18
Prezıdent saılaýy: Toqaevty qoldaý jónindegi halyqtyq koalıtsııa qurylady

ASTANA. QazAqparat – Qasym-Jomart Toqaevty qoldaý jónindegi halyqtyq koalıtsııa qurylady. Bul týraly AMANAT partııasynyń tóraǵasy – QR Parlamenti Májilisiniń spıkeri Erlan Qoshanov aıtty, dep habarlaıdy QazAqparat tilshisi.

«Ózderińizge belgili, bizden basqa da birqatar partııalar men saıası birlestikter prezıdenttikke Memleket basshysy Qasym-Jomart Kemeluly Toqaevtyń kandıdatýrasyn usynyp otyr. Osy oraıda biz sol saıası uıymdarmen birlesip, Qasym-Jomart Kemeluly Toqaevty qoldaý jónindegi halyqtyq koalıtsııa qurý jóninde kelisimge keldik», - dedi ol AMANAT partııasynyń kezekten tys XXIV sezinde.

Erlan Qoshanov búgin Prezıdent Q.Toqaevtyń qatysýymen forým ótetinin aıtty.

«Tústen keıin osy ǵımaratta Memleket basshysynyń qatysýymen úlken forým ótedi. Soǵan bárimiz qatysamyz. Barshańyzdy Ádiletti Qazaqstan qurý jolyndaǵy ıgi bastamalardy iske asyrý úshin judyryqtaı jumylýǵa shaqyramyn», - dedi partııa tóraǵasy.

Eske salaıyq, b úgin AMANAT partııasy Qasym-Jomart Toqaevty prezıdenttikke kandıdat retinde usyný sheshimin qabyldaǵan bolatyn. Sondaı-aq búgin «Qazaqstan Halyq partııasynyń» kezekten tys sezi ótip, delegattar aldaǵy saılaýǵa Qasym-Jomart Toqaevtyń kandıdatýrasyn qoldady.

Buǵan deıin Q.Toqaevtyń kandıdatýrasyn prezıdenttikke máslıhattar depýtattarynan quralǵan respýblıkalyq qoǵamdyq birlestigi, «Qazaqstan sportshylar odaǵy» respýblıkalyq qoǵamdyq birlestigi, Qazaqstannyń Azamattyq alıansy, «Ardagerler uıymy» respýblıkalyq qoǵamdyq birlestigi, «Qazaqstan Team» qoǵamdyq birlestigi, Ulttyq volonterlik jelisi usynǵan edi.


Uqsas jańalyqtar
Seriktester jańalyqtary

Jańalyqtar