Prezıdent mektep baǵdarlamasyna shahmatty qosý týraly usynysty qoldady
2022 jylǵy 22 maýsym 14:18

Prezıdent mektep baǵdarlamasyna shahmatty qosý týraly usynysty qoldady

NUR-SULTAN. QazAqparat - QR Prezıdenti Qasym-Jomart Toqaev shahmattan Qazaqstan áıelder quramasynyń múshelerimen jáne shahmat federatsııasynyń ókilderimen kezdesti, dep habarlaıdy Aqorda.

Aqordaǵa Prezıdentpen kezdesýge álem chempıondary men halyqaralyq grossmeısterler – Jansaıa Ábdimálik, Dınara Sádýaqasova, Bıbisara Asaýbaeva, Gúlishan Naqbaeva, halyqaralyq sheber – Merýert Kamalıdenova jáne Qazaqstan shahmat federatsııasynyń prezıdenti Ǵalym Qusaıynov pen vıtse-prezıdent Dármen Sádýaqasov shaqyryldy.

Memleket basshysy tanymal shahmatshy qyzdarǵa iltıpat bildire otyryp, bul oıynǵa erekshe mán beretinin atap ótti. Sondaı-aq Qazaqstannyń áıelder quramasy aldaǵy ýaqytta Úndistanda ótetin Dúnıejúzilik shahmat olımpıadasynda tabysty óner kórsetetinine senim bildirdi. Prezıdent mektepti «Altyn belgimen» bitirgen Bıbisara Asaýbaevaǵa tabys tilep, Gúlishan Naqbaevany ótken týǵan kúnimen quttyqtady.

Áńgimelesý jáne pikir almasý formatynda ótken kezdesýde ulttyq qurama kóshbasshylary – Dınara Sádýaqasova, Jansaıa Ábdimálik, Bıbisara Asaýbaeva jáne Qazaqstan shahmat federatsııasynyń basshylyǵy sóz sóıledi.

Qasym-Jomart Toqaev kezdesýde elimizde shahmat sportyn damytý, onyń ishinde memleket tarapynan júıeli kómek kórsetý, qajetti ınfraqurylymmen qamtamasyz etý jáne shahmatty jeke sport túri retinde nasıhattaý jónindegi qatysýshylardyń usynystaryn tyńdady.

Prezıdent mektep baǵdarlamasyna shahmatty fakýltatıvtik pán retinde qosý, Almatyda 1500 balaǵa arnalǵan shahmat pen aqparattyq tehnologııalardy tereńdetip oqytatyn mektep-ınternat salý jónindegi usynysty qoldady. Budan bólek, Memleket basshysy kásipkerler tarapynan shahmat sportyn damytýǵa qoldaý kórsetýdiń mańyzdy ekenine basa mán berdi.

Kezdesý sońynda Qasym-Jomart Toqaev shahmat salasyn damytýǵa budan bylaı da qoldaý kórsetetinin atap ótip, jas sportshylarǵa halyqaralyq arenada jańa tabys tiledi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT