Prezıdent maqalasy memleketimizdiń bolashaq sulbasyn qalyptastyrýda qýatty ıdeologııalyq negiz bolady – Erlan Karın
2021 jylǵy 5 qańtar 20:24

Prezıdent maqalasy memleketimizdiń bolashaq sulbasyn qalyptastyrýda qýatty ıdeologııalyq negiz bolady – Erlan Karın

NUR-SULTAN. QazAqparat – Memleket basshysy Qasym-Jomart Toqaevtyń maqalasy memleketimizdiń bolashaq sulbasyn qalyptastyrýda qýatty ıdeologııalyq negiz bolady. Mundaı pikirdi QR Prezıdentiniń kómekshisi Erlan Karın bildirdi, dep habarlaıdy QazAqparat tilshisi.

«Búgin QR Prezıdenti Qasym-Jomart Toqaevtyń «Táýelsizdik bárinen qymbat» atty baǵdarlamalyq maqalasy jaryq kórdi. Іs júzinde bul maqala Táýelsizdiktiń 30 jyldyǵy jylyn ashyp, osynaý mejeli jylǵa baǵyt berýmen qatar, basty jumystarǵa ekpin beredi. Prezıdent Qazaqstannyń egemen damýynyń ótken otyz jyldyǵyndaǵy negizgi qorytyndysyn shyǵaryp, jańa kezeńdegi damý basymdyqtaryn aıqyndaıdy. Ol tórtinshi onjyldyqtyń basty maqsaty retinde ádil qoǵam men tıimdi memleket qurýdy aıqyndap berdi. Bul rette eldiń kez kelgen jetistigi barsha azamattyń shynaıy ıgiligimen ólshenýi tıistigine taǵy bir márte basa mán berý Qasym-Jomart Toqaevyń maqalasyna tán. Bul Prezıdenttiń Memleket basshysy laýazymyndaǵy barlyq sheshimderine negizdelgen túbegeıli senimderiniń biri», - dedi ol.

Onyń atap ótýinshe, Prezıdent maqalasynda kóptegen jańa ıdeıa men usynystar bar. Olar gýmanıtarlyq ǵylymdy damytý, tarıhı sanany qalyptastyrý, memlekettik tildiń róli, etnosaralyq kelisimdi saqtaý jáne jastardy qoldaý syndy salalardy qamtıdy. Osy rette Erlan Karın Memleket basshysynyń saıası jańǵyrý jóninde aıtqan sózderine erekshe nazar aýdarady.

«Prezıdent reformalardy aqylǵa qonymdy ári júıeli júzege asyrý qajettigin erekshe atap ótti. Degenmen, ony soza berýge bolmaıtyndyǵyn da eksertti. Qasym-Jomart Toqaev bılik halyq aldyndaǵy jaýapkershiligin barlyq ýaqytta sezinýi tıistigine nazar aýdartty. Osyǵan oraı Memleket basshysy alǵashqy ret aýyl ákimderin saılaýdan keıin, aýdan ákimderin saılaý ótetindigin aıtty. Bul tetik is júzinde óziniń tıimdiligin kórsetetin bolsa, onda kelesi deńgeıdegi ákimderdi saılaýǵa kóshý týraly sheshim qabyldanatyn bolady. Shyn máninde bul búgingi maqaladaǵy eń negizgi tezısterdiń biri», - dedi Prezıdent kómekshisi.

Sonymen qatar ol memlekettigimizdiń jańa tarıhı kezeńindegi Qazaqstan Prezıdentiniń maqalasy bolashaqtyń sulbasyn qalyptastyratyn qýatty ıdeologııalyq negiz bolatyndyǵyn basa aıtady.


Jańalyqtar

MURAǴAT