Prezıdent: Kaspıı ıtbalyǵy – transshekaralyq bıoresýrs
2022 jylǵy 29 maýsym 18:42

Prezıdent: Kaspıı ıtbalyǵy – transshekaralyq bıoresýrs

NUR-SULTAN. QazAqparat – QR Prezıdent Qasym-Jomart Toqaev altynshy Kaspıı sammıtinde teńizdegi ıtbalyq popýlıatsııasyna tónip turǵan qaýip týraly paıymyn aıtty, dep habarlaıdy QazAqparat tilshisi.

«Bárimizge ortaq teńizdiń ekologııalyq problemalary sóz bolǵanda Kaspıı ıtbalyǵynyń basyndaǵy múshkil ahýaldy aıtpaı kete almaımyn. Itbalyqtardyń qaıta-qaıta qyrylýy úlken qaýip tóndiredi. Kaspıı ıtbalyǵy – jergilikti faýnadaǵy sútqorektilerdiń jalǵyz ókili. Ol búkil teńiz aýmaǵyn meken etetin transshekaralyq bıoresýrs sanalady. Byltyr Qazaqstan men Reseı arasynda Kaspıı ıtbalyǵynyń popýlıatsııasyn saqtaý jónindegi birlesken is-qımyldyń bes jyldyq josparyna qol qoıyldy. Budan bólek 1974 jyldan beri Kaspııdiń soltústiginde Qazaqstan men Reseıge tıesili qoryq aımaqtary bar. Alaıda Qyzyl kitapqa engen osy bir janýardy saqtaý maqsatynda qabyldanǵan sharalar áli de jetkiliksiz. Sondyqtan qazir biz qoryq aýmaǵyn erekshe qorǵalatyn tabıǵat aýmaǵy retinde qaıta qurý máselesin qarastyryp otyrmyz. Kaspıı mańyndaǵy barlyq memleketti Qazaqstan men Reseıdiń bastamasyn qoldaýǵa jáne oǵan qosylýǵa shaqyramyz», -dedi Memleket basshysy.

Sondaı-aq Qasym-Jomart Toqaev Kaspıı teńizindegi tabıǵı resýrstardy zańsyz ıgerýmen kúrestiń mańyzdylyǵyna toqtaldy.


«Ókinishke qaraı, bıoresýrstardy zańsyz ıgerýdiń, balyq ónimderin alýdyń, bekireni zańsyz jolmen satý men satyp alýdyń faktileri áli kezdesedi. Osy sııaqty zańsyzdyqtardyń aldyn alyp, kúresý úshin bizdiń sarapshylar tıisti qaýly jobasymen jumys istep jatyr»,- dedi Prezıdent.


Foto: www.wallpapermaiden.com


Seriktester jańalyqtary

Jańalyqtar

Úrdis

MURAǴAT