Prezıdent dıpkorpýs ókilderin elimizdiń dıplomatııalyq qyzmetiniń 30 jyldyǵymen quttyqtady
2022 jylǵy 1 shilde 12:14

Prezıdent dıpkorpýs ókilderin elimizdiń dıplomatııalyq qyzmetiniń 30 jyldyǵymen quttyqtady

NUR-SULTAN. QazAqparat – Elimizdiń dıplomatııalyq qyzmetiniń otyz jyldyq mereıtoıy halqymyz Jańa Qazaqstan qurýǵa kirisken syndarly sátpen tuspa-tus keldi.

Bul jaıynda QR Prezıdenti Qasym-Jomart Toqaevtyń «Halyqaralyq qatynastardyń qazirgi zamanǵy júıesindegi Qazaqstan Respýblıkasy» atty halyqaralyq konferentsııa qatysýshylaryna joldaǵan quttyqtaý hatynda aıtylǵan, dep habarlaıdy QazAqparat tilshisi.

«Qurmetti Qazaqstan Respýblıkasy dıplomatııalyq qyzmetiniń ardagerleri men qyzmetkerleri! Sizderdi elimizdiń dıplomatııalyq qyzmetiniń 30 jyldyq mereıtoıymen shyn júrekten quttyqtaımyn. Biz osynaý tarıhı mejege úlken jetistiktermen jettik», - delingen QR Syrtqy ister mınıstri Muhtar Tileýberdi oqyp bergen Memleket basshysynyń hatynda.

QR Prezıdentiniń atap ótýinshe, elimiz 186 elmen qarym-qatynas ornatyp, 50 halyqaralyq uıymnyń múshesi boldy.

«Biz óńirlik jáne jahandyq protsesterge belsendi qatysatyn ornyqty ári bedeldi memleketke aınaldyq. Sizder táýelsizdigimizdiń alǵashqy kúninen elimizdiń múddesin halyqaralyq arenada qorǵap kelesizder. Qazirgi geosaıası turaqsyzdyq jaǵdaıynda sizder jahandyq álemde Qazaqstannyń ustanymyn nyǵaıtýǵa jáne shet memlekettermen yntymaqtastyqty damytýǵa úlken úles qosasyzdar», - dedi Qasym-Jomart Toqaev.

Memleket basshysy elimizdiń dıplomatııalyq qyzmetiniń otyz jyldyq mereıtoıy halqymyz Jańa Qazaqstan qurýǵa kirisken syndarly sátpen tuspa-tus kelgenin basa atap ótedi.

«Osyǵan oraı Syrtqy ister mınıstrligine úlken jaýapkershilik júkteledi. Dıplomattardyń basty mindeti - memleketimizdiń álemdegi mártebesin odan ary arttyrý, syrtqy qaýipsizdikti qamtamasyz etý, sheteldegi azamattarymyzdyń quqyqtary men múúddelerin qorǵaý», - dedi QR Prezıdenti.


Uqsas jańalyqtar

Jańalyqtar

Úrdis

MURAǴAT