Premer-Mınıstr óńirlerdegi ınflıatsııa máselesine nazar aýdarýdy tapsyrdy

NUR-SULTAN. QazAqparat – Premer-Mınıstr Asqar Mamın Úkimet otyrysynda óńirlerdegi ınflıatsııa máselesine nazar aýdarýdy tapsyrdy, dep habarlaıdy QazAqparat tilshisi.

«Atyraý, Mańǵystaý, Qaraǵandy oblystarynda, Shymkent pen Nur-Sultan qalasynda kórsetkishter respýblıkalyq ortasha deńgeıden joǵary. Sonymen birge, Almaty, Atyraý, Nur-Sultan, Qaraǵandy, Qostanaı, Jezqazǵan qalalarynda áleýmettik mańyzy bar azyq-túlik baǵalary ósýde. Baqyt Turlyhanuly buǵan qatysty ne aıtar edińiz», - dedi Premer-Mınıstr Saýda jáne ıntegratsııa mınıstri Baqyt Sultanovqa qarata aıtqan sózinde.

Atalmysh máselege qatysty Saýda jáne ıntegratsııa mınıstri Baqyt Sultanov jyl basynan beri áleýmettik mańyzy bar birqatar taýardyń baǵasy 10 paıyzǵa óskenin aıtty.

«Bul jaǵynan jergilikti atqarýshy organdarda barlyq múmkindikter bar. Baǵalardyń ruqsat etilgen shekti mánderin bekitý týraly quqyqtary zańda belgilengen. Biraq, jyldyń basynan beri qarasaq, 66 pozıtsııa boıynsha baǵanyń 15 paıyzǵa óskeni baıqalýda. Biraq, birde-bir jaǵdaıda tıisti mindettemelerdiń oryndalmaǵanyn kórip otyrmyz. Bul týraly jergilikti atqarýshy organdarǵa ótken aıda da aıtyldy. Biraq, degenmen nátıje joq. Sondyqtan, jyldyń aıaǵyna deıin tıisti tapsyrma berildi. Qosymsha nátıjesin qarastyrǵannan keıin tıisti sheshimdi qabyldaýdy usynamyz», - dedi ol.

Baqyt Sultanovtyń sózin sensek, deldaldar da máseleni qıyndatyp tur.

«Osy ýaqytqa deıin 8 is qana qozǵalǵan. Biraq, bunyń barlyǵy óndirýshilerge qatysty qozǵalǵan ister. Al deldaldarǵa qatysty eshqandaı shara qoldanylmaı keledi. Sol sebepti, jergilikti atqarýshy organdar salyq organdarymen, básekelestikti qorǵaý komıtetimen birge deldaldar boıynsha naqty jumysty júrgizý kerek bolady», - dedi mınıstr.

Óz kezeginde Úkimet basshysy azyq-túlik pen taýardyń qymbattaý máselesi Memleket basshysynyń tóraǵalymen ótetin Úkimettiń aldaǵy otyrysynda qaralatynyn atap ótti.