Praımerız kandıdattarynyń arasynda qandaı mamandar kóp boldy
2020 jylǵy 6 qazan 16:37

Praımerız kandıdattarynyń arasynda qandaı mamandar kóp boldy

NUR-SULTAN. QazAqparat – «Nur Otan» partııasynyń hatshysy Arman Qyryqbaı «Praımerız 2020» ishki partııalyq irikteýiniń negizgi qorytyndylaryn baıandady, dep habarlaıdy QazAqparat.

«Tórt kúnde Nur Otan tirkelgen músheleriniń 84,2 paıyzy nemese 662 687 adam daýys bergen. Daýys berýge qatysqan 581 104 partııalyq onlaın formatta tańdaý jasady. Al ınternetke qosylý múmkindigi áli sheshilmegen shalǵaı aýdandarda turatyn 81 583 myń adam qaǵaz túrinde daýys berdi», - dedi A. Qyryqbaı QR Prezıdenti janyndaǵy Ortalyq kommýnıkatsııalar qyzmetinde.

Onyń aıtýynsha, praımerızge uzyn sany 10 990 kandıdat qatysqan jáne onyń 7 143-i ózin-ózi usynǵan. Úmitkerlerdiń ortasha jasy – 43. Onyń 36,7% astamy – áıelder, 29% – 35 jasqa deıingi jastar boldy.

«Negizgi áleýmettik toptardyń qamtylýyna kelsek, kandıdattardyń sapaly quramy qyzmetterine qaraı bylaı bólindi: 31% – bilim jáne ǵylym salasynyń ókilderi, 14% – shaǵyn jáne orta bıznes, 7,8% – mádenıet jáne sport, 7,1% – qyzmet kórsetý salasy, 7,2% – aýyl sharýashylyǵy salasy jáne 4,6% – ónerkásip jáne ekonomıkanyń basqa salalarynyń ókilderi», - dep túsindirdi partııa hatshysy.

«Praımerız jańa áleýmettik lıft qyzmetin atqaryp, qatysýshylarǵa jarııa saıasatta ózderin kórsetýge, óz kózqarastary men ustanymdaryn qorǵaı alýǵa múmkindik berdi. Báseke barysyn barshasy baqylady. Árkim úgit-nasıhatyn jeke strategııasy men taktıkasy turǵysynan júrgizýge múmkindik aldy. Qazaqstannyń túkpir-túkpirinde1980 pikirsaıys ótkizildi. Olar túrli sıpatta boldy. Jalpy adamdardyń mundaı ashyq saıası doda negizderin endi ǵana ıgere bastaǵanyn eskersek, barlyq pikirtalas óz deńgeıinde tartymdy jáne qyzyqty ótti deýge negiz bar», - dedi Arman Qyryqbaı.


Jańalyqtar

MURAǴAT