Praımerız: Áleýmettik jelide belsendi bolǵandar nege jeńilip qaldy
2020 jylǵy 6 qazan 18:29

Praımerız: Áleýmettik jelide belsendi bolǵandar nege jeńilip qaldy

NUR-SULTAN. QazAqparat – QR Prezıdenti janyndaǵy Ulttyq qoǵamdyq senim keńesiniń múshesi, saıasattanýshy Erlan Saırov «Praımerız ádil ótpedi» degen pikirlerge jaýap berdi, dep habarlaıdy QazAqparat tilshisi.

«Praımerız óziniń rólin tolyqqandy oryndady. Biz bir nárseni túsinýimiz kerek, bul Praımerız Qazaqstannyń búkil áleýmettik, ekonomıkalyq nemese qoǵamdyq-saıası máselesin sheship tastaıtyn ádis-tásil emes. Praımerız – elimizde demokratııanyń alǵyshartyn jasaýǵa arnalǵan eń negizgi birinshi qadam. Árıne, birinshi qadam bolǵandyqtan, onda kóptegen kemshilikter, shalys qadamdar bolady jáne bola beredi», - dedi saıasattanýshy QR Prezıdenti janyndaǵy Ortalyq kommýnıkatsııalar qyzmetinde.

Spıker áleýmettik jelide belsendi bolǵan úmitkerlerdiń ne úshin jeńilgenin túsindirdi.

«Men ózim áleýmettik jelini qoldanamyn, onda óz oıymdy ashyq jazamyn. Biraq bizdiń elimizde áleýmettik jelini paıdalaný men naqty saıası protsess - eki bólek nárse. Áleýmettik jelide 10-20 myń oqyrmany bar nemese myńdaǵan laık jınaıtyn azamattar qoǵamdyq protseske kelgende jeńilip qalýy yqtımal. Óıtkeni, qazir elektorat daýys beredi. Al endi «Nur Otan» partııasynyń elektoraty – dástúrli túrde muǵalim, dáriger jáne iri kásiporyndardyń jumysshylary, solardyń ınjenerlik quramy. Ol kisiler áleýmettik jelide otyrmaıdy. Sondyqtan, áleýmettik jelide kóp jumys istegen azamattar óz kúshin osy naqty muǵalimder men dárigerlermen jumysqa jumsaýy kerek edi. Biz osyny túsinip, lıga bir aı boıy Qazaqstandaǵy kóptegen jastarǵa saıası tehnologııany qalaı júrgizý kerektigi týraly semınar ótkizdik. Men ózim sabaq berdim. Soǵan qatysqan kóptegen azamattar jeńip ketti. ıAǵnı, búgingi tańda praımerız degenimiz – eń aldymen joba. Budan keıin de kóptegen jobalar bola beredi. Árıne, biraz kemishilikter boldy. Kóptegen adamdar tikeleı halyq daýys beredi dep oılap, áleýmettik jelide jumys istedi», - dedi E. Saırov.

Sonymen birge, saıasattanýshy ishki saılaýda jeńbegen azamattarǵa úndeý jasady.

«Saıasatpen aınalysý – ómir boıǵy protsess. Búgin jeńiledi, erteń jeńedi. Bizdiń aldymyzda elektoraldyq tsıkl tur. Parlament pen Májilis ótken soń, jazda aýyldyq deńgeıdegi ákimderdiń tikeleı saılaýy bolady. Menińshe, qazirgi azamattyq Praımerızge qatysý – sol ákimdik saılaýǵa úlken daıyndyq bolýy kerek», - dedi Erlan Saırov.

«Nur Otan» partııasynyń hatshysy Arman Qyryqbaı «Praımerız 2020» ishki partııalyq irikteýiniń negizgi qorytyndysyn baıandady.

Onyń aıtýynsha, praımerızge uzyn sany 10 990 kandıdat qatysqan jáne onyń 7 143-i ózin-ózi usynǵan. Úmitkerlerdiń ortasha jasy – 43. Onyń 36,7% astamy – áıelder, 29% – 35 jasqa deıingi jastar boldy.


Jańalyqtar

MURAǴAT