Polshanyń Belostok qalasynda Qazaqstannyń Qurmetti konsýldyǵy ashyldy
2022 jylǵy 25 maýsym 20:33

Polshanyń Belostok qalasynda Qazaqstannyń Qurmetti konsýldyǵy ashyldy

NUR-SULTAN. QazAqparat – Dıplomatııalyq qarym-qatynastyń 30 jyldyǵy aıasynda Polshanyń Belostok qalasynda Qazaqstan Respýblıkasynyń Qurmetti konsýldyǵy ashyldy, dep habarlaıdy QazAqparat Syrtqy ister mınıstrligine silteme jasap.

Belostoktaǵy Joǵary ekonomıka mektebiniń rektory, Óńirlik damý agenttigi baqylaý keńesiniń tóraǵasy, professor Aleksandr Prokopıýk Qurmetti konsýl bolyp taǵaıyndaldy.

«Qazaqstan Ortalyq Azııadaǵy áleýmettik-ekonomıkalyq ózgeristerdiń sózsiz kóshbasshysy jáne osy óńirdegi eń turaqty memleket retinde tanyldy. El bıligi kásipkerlerdi ekonomıkanyń túrli salalaryna, atap aıtqanda aýyl sharýashylyǵyna, aqparattyq tehnologııalarǵa, farmatsevtıka ónerkásibine jáne jańartylatyn energııa kózderine ınvestıtsııa tartýǵa yntalandyrady. Qazaqstan sheteldik ınvestorlardy, sondaı-aq eldegi sheteldik kapıtaly bar kompanııalardy qorǵaý úshin qajetti sharalardy qabyldap jatyr. El úkimeti ekonomıkany damytýǵa baǵyttalǵan saıasatty júrgizip keledi, keleshekte Qazaqstan álemniń eń damyǵan 30 eliniń qataryna kirýdi josparlap otyr. Óz tarapymnan Qazaqstan men Polsha arasyndaǵy ekijaqty qarym-qatynastardy nyǵaıtýǵa bar kúsh-jigerimdi salamyn», – dedi ol.

Ókildiktiń ashylý rásimine Qazaqstan Elshisi Álim Qırabaev, jergilikti oblystyq ákimshiliktiń basshylary – Marshalok Artýr Kosıtskıı jáne Voevoda Bogdan Pashkovskıı, Eýroparlament depýtaty Karol Karskıı, Polsha SІM Shyǵys departamentiniń dırektory Mıhal Grodzkıı, Qazaqstan, Fınlıandııa, Bolgarııa, Horvatııa, Bosnııa jáne Gertsegovınanyń qurmetti konsýldary, joǵary oqý oryndarynyń rektorlary men professorlary, sondaı-aq óńirdegi iskerlik toptar jáne BAQ ókilderi qatysty.

Elshi Álim Qırabaev óz sózinde Qazaqstanda júzege asyrylyp jatqan júıeli reformalar aıasynda Qurmetti konsýldyq qyzmeti saıası, ekonomıkalyq jáne mádenı-gýmanıtarlyq salalardaǵy Qazaqstan-Polsha yntymaqtastyǵynyń damýy men keńeıýine odan ári serpin beretinin atap ótti. Negizgi jumys Qazaqstan azamattaryna kómek kórsetýge jáne olardyń quqyqtary men múddelerin qorǵaýdy qamtamasyz etýge, sondaı-aq Qazaqstan men Polsha óńirleriniń ózara is-qımylyn damytýǵa baǵyttalady.

Polsha Syrtqy ister mınıstrliginiń ókili Mıhal Grodzkıı Qazaqstan Polshanyń Ortalyq Azııadaǵy mańyzdy ekonomıkalyq seriktesteriniń biri bolyp tabylatynyn atap ótti, sondaı-aq elimiz júrgizip jatqan aýqymdy reformalardy júzege asyrýda polıak tarapynyń qoldaýyn jetkizdi.

Jergilikti oblystyq ákimshiliktiń basshylary Qurmetti konsýldyq jalpy Polsha men Qazaqstan arasyndaǵy jáne jeke óńirler arasyndaǵy mádenı-gýmanıtarlyq, ekonomıkalyq baılanystardy damytý úshin perspektıvalar ashatynyn atap ótti.

Qurmetti konsýldyqtyń bul qalada ornalasýy kezdeısoq emes. Geografııalyq jaǵdaıyna baılanysty Belostok – Polshanyń shyǵysyndaǵy eń iri kólik ortalyǵy, sonymen qatar Podlıask voevodalyq aımaǵynyń mańyzdy mádenı ortalyǵy. Belostoktaǵy qurmetti konsýldyqtyń qaraýyndaǵy Podlıask jáne Lıýblın joǵary oqý oryndarynda 200-den astam qazaqstandyq stýdent bilim alyp jatyr.

Qazirgi ýaqytta Polshada Gdansk, Vrotslav, Krakov, Katovıtse jáne Belostok qalalarynda Qazaqstan Respýblıkasynyń 5 qurmetti konsýldyǵy bar.


Jańalyqtar

Úrdis

MURAǴAT