Polsha kompanııasy «Patrýl» serıalynyń lıtsenzııasyn satyp aldy
2022 jylǵy 23 maýsym 17:15

Polsha kompanııasy «Patrýl» serıalynyń lıtsenzııasyn satyp aldy

NUR-SULTAN. QazAqparat – Polshanyń «Polot media» kompanııasy qazaqstandyq «Patrýl» serıalynyń lıtsenzııasyn satyp aldy. Bul aqparatty QazAqparat tilshisiniń saýalyna jaýap bergen týyndy stsenarısteriniń biri Marat Oralǵazın rastady.

«Kelissózder byltyr júrgizile bastady. Al bıyl jyl basynan beri sheteldik kompanııa stsenarııdi ózderiniń aýdıtorııasyna saı óńdeý jumystaryn jasady. ıAǵnı, olar bizdiń barlyq stsenarııdi alyp, ony polıak tiline aýdaryp, sol personajdarmen túsiredi. Meniń bilýimshe, túsirilim keshe Polsha terrıtorııasynda bastaldy. Qazaqstandyq akterler oǵan qatyspaıdy», - dedi serıaldyń stsenarıı avtory.

Sonymen qatar Marat Oralǵazın sheteldik kompanııanyń atalǵan serıalǵa ne úshin qyzyǵýshylyq tanytqanyn aıtty.

«Olar ınternetten serıaldy kórip, unatqan. Keıin tolyq zertteı bastapty. Ózderine kúlkili bolǵan. Bul teletýyndy olardyń mentalıtetine saı keletin bolsa kerek. Múmkin olardyń polıtseıleriniń is-áreketi bizdikimen tuspa-tus kelip turǵan shyǵar. Bul jańalyqty shyǵarmashylyq top asa qýanyshpen qabyldady», - dep túıindedi Marat Oralǵazın.

«Patrýl» serıalynyń lıtsenzııasyn satý boıynsha kelissózderdi týyndy jaryq kórgen telearnanyń basshylyǵy júrgizgen. Marat Oralǵazınniń aıtýynsha, búginde otandyq ózge de teleserıaldarǵa qyzyǵýshylyq bildirgen sheteldik kompanııalar bar. Olarmen kelissózder júrgizilip jatyr.


Jańalyqtar

Úrdis

MURAǴAT