Pikirsaıysqa qatyspaǵan 27 kandıdat praımerızden shyǵarylǵan
2020 jylǵy 5 qazan 21:33

Pikirsaıysqa qatyspaǵan 27 kandıdat praımerızden shyǵarylǵan

NUR-SULTAN. QazAqparat - «Nur Otan» partııasynyń hatshysy Marat Sembekov praımerız qorytyndysyn jarııalady, dep habarlaıdy QazAqparat.

«Nazarlaryńyzǵa Partııalyq baqylaý komıtetiniń jumys qorytyndylaryn usynamyz. Praımerızge kandıdattardy tirkeý bastalǵannan beri 30-dan astam aryz-shaǵym qaralǵan. Praımerızge qatysýdan barlyǵy 34 kandıdat alynyp tastaldy, onyń ishinde 27-si pikirsaıysqa qatyspaǵany úshin shyǵaryldy. Shaǵymdar men tártip buzýdyń kóbi Nur-Sultan jáne Almaty qalalarynda, Aqmola, Jambyl, Qaraǵandy jáne Túrkistan oblystarynda tirkelgen. Sonymen, G.Alıhanqyzynyń shaǵymy boıynsha partııa atyna kir keltiretin is-áreketteri úshin J.Zekeıuly kandıdat retinde tirkeýden alyndy. «Azııa Tsentr Snab JShS» BPU jańa múshelerin partııaǵa dáıeksiz málimettermen qabyldaǵany úshin kandıdattar Ý.Alıeva men D.Perneevanyń tirkelýi joqqa shyǵaryldy. Onlaın daýys berý barysynda partııa músheleriniń mobıldi telefon nómirlerin jalǵan engizgeni úshin M.Bolysbek jáne T.Erǵalıev tirkeýden alyndy» dep jazdy Marat Sembekov Facebook paraqshasynda.

Onyń aıtýynsha, praımerız barysynda 30-dan astam partııa múshesine partııalyq shara qoldanylǵan.

«Kandıdattarǵa úgit-nasıhat júrgizý alańdaryn usynbaǵany úshin Almaty qalasy Bostandyq aýdanynyń ákimi A.E. Rahımbetovke sógis jarııalandy, Almaty qalasy Bostandyq jáne Áýezov aýdandyq fılıaldary tóraǵalarynyń birinshi orynbasarlary B.M.Djambylov pen N.A. Ordabaevaǵa, sonymen birge Nur-Sultan qalasy Esil aýdandyq fılıaly tóraǵasynyń birinshi orynbasary M.K.Qasymovqa eskertý berildi. Kandıdattardyń mektepterde jáne basqa da memlekettik mekemelerde úgit-nasıhat júrgizýine jol bermeý boıynsha sharalar qabyldandy. Almaty qalasynda úgit-nasıhat materıaldaryn jabystyrý jáne Atyraý oblysynda memlekettik jaýapty tulǵanyń sýretin onyń ruqsatynsyz paıdalaný faktileriniń joly kesildi. Aqmola jáne Qaraǵandy oblystarynda 480 partııa múshesiniń bir telefon nómirimen tirkeý faktisi toqtatyldy» deıdi partııa hatshysy.

Sondaı-aq Taraz qalasynda naqty kandıdattarǵa daýys berý úshin SMS-kodty anyqtaý maqsatynda partııa múshelerine qońyraý shalǵan esep komıssııasy múshelerine partııalyq jazalaý sharasy qoldanylǵan.

Qazir Partııalyq baqylaý komıtetine jáne onyń aımaqtardaǵy komıssııalaryna daýys berý kezindegi tártip buzý faktileri jóninde shaǵymdar túsip jatyr. Barlyq aryz boıynsha jedel tekseris ótkizilip, tıisti sharalar qabyldanýda.

«Jalpy, Elbasynyń tapsyrmasyna sáıkes Partııalyq baqylaý komıtetiniń halyq kóterip jatqan rezonansty máselelerge jedel áreket etý, sonymen birge partııa músheleriniń Jarǵyny, Ádep kodeksin jáne partııanyń basqa da baǵdarlamalyq qujattaryn saqtaýyn monıtorıngileý boıynsha jumys kúsheıtildi. Partııalyq baqylaý komıtetiniń osy baǵyttaǵy jumysy júıeli túrde jalǵastyrylyp, BAQ pen áleýmettik jelilerde keńinen jarııalanady» dep atap ótti Marat Sembekov.


Avtor:
Tilshi

Jańalyqtar

MURAǴAT