Jańalyqtar  >

Petropavldyqtarǵa sý qubyrynyń jarylýynan bolǵan shyǵyndy kim óteıdi

2022 jylǵy 2 jeltoqsan, 16:35
Petropavldyqtarǵa sý qubyrynyń jarylýynan bolǵan shyǵyndy kim óteıdi

PETROPAVL. QazAqparat – Petropavlda sý jelisinde bolǵan apatqa merdiger kompanııa jaýap beredi. Byltyr paıdalanýǵa berilgen sý trassasynyń kepildi merzimi aıaqtalmaǵan, dep habarlaıdy QazAqparat tilshisi.

Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, jarylǵan sý qubyry tozýyna baılanysty 2019 jyly jańǵyrtýdan ótken. Sol joly sý trassasynyń 300 metri aýystyryldy. Merdiger kompanııa – «Remstroıservıspv» JShS. Bul – astanalyq uıym. Osy maqsatqa 87 mln teńge jumsaldy.

«Kompanııa tarapynan jumys ýaqtyly atqaryldy. Tek kógaldandyrý boıynsha másele boldy, olar merziminde aıaqtap úlgermedi. Osyǵan baılanysty qala ákimdigi birneshe ret eskertý aıtty.

Sý qubyryn jańǵyrtý jumysy kelisim boıynsha tolyq atqaryldy. Nysan byltyr paıdalanýǵa berildi. Eki jyl kepildik merzimi bar. Ol áli bitken joq», - deıdi bólimniń baspasóz hatshysy Ásem Aıtýlova.

Apattyń saldary áli tolyq joıylǵan joq. «Qyzyljar Sý» JShS-niń avarııalyq brıgadalary ótken túnnen beri jumys istep jatyr. Ol áli aıaqtalǵan joq. Tek sodan keıin ǵana «Qyzyljar Sý» merdiger kompanııadan shyǵyndy óndirip almaq.

«Ázirge apattyń sebebi tolyq anyqtalǵan joq. Eger de jumystyń sapasyz atqarylǵany dáleldenetin bolsa, onda merdiger barlyq turǵynǵa materıaldyq shyǵynnyń ornyn toltyrady. Al ákimdik tarapynan bul uıymǵa qatysty talap-tilek joldanady, qajet bolsa sotqa júginedi.

Kesheden beri mamandar sol aýdandaǵy úılerdi aralap, shyǵyn shekken turǵyndardy anyqtap jatyr. Bul baǵyttaǵy jumys áli aıaqtalǵan joq. Eger de osy apat kezinde turǵyndardyń úıin sý bassa, olar 109 nómiri arqyly iKOMEK-ke habarlasa alady. Bizdegi málimet boıynsha eshbir úıge sý kirgen joq, tek aýlalar, balalar alańdaryn sý basty. Ázirge eki turǵynnan ǵana aryz tústi», - deıdi Ásem Aıtýlova.

Esterińizge salaıyq, keshe Petropavlda D-800 mm sý qubyry jarylyp, qala sýsyz qaldy.

Oqıǵa ornyna jumysyna endi kirisken SQO ákimi Aıdarbek Saparov ta baryp, jaǵdaıdy kórdi.

Ázirge, sýmen qamtý tolyq qalpyna kelgen joq.


Uqsas jańalyqtar
Seriktester jańalyqtary

Jańalyqtar