Petropavlda jylý magıstralin qaıta qurý jumystary bastaldy

PETROPAVL. QazAqparat – Petropavldy jylýmen qamtıtyn kásiporyn ınvestıtsııalyq baǵdarlama aıasynda qubyr jelilerin qaıta qurý jumystaryn bastady, dep habarlaıdy QazAqparat tilshisi.

«SevKazEnergo» AQ baspasóz qyzmetiniń málimetinshe, «Petropavl Jylý Jelileri» JShS Krepostnoı kóshesindegi № 7 jylý magıstralin qaıta qurý jumystaryn bastady. Biraq budan turǵyndar zardap shekpeıdi. Jylý berý maýsymy aıaqtalǵansha deıin bul aýdan ýaqytsha keste boıynsha jylý energııasymen qamtylady. Mamandar bul jumystar barysynda jylýmen jáne ystyq sýmen qamtý sapasy ózgerissiz qalatynyn aıtýda.

№ 7 jylý magıstrali Altynsarın kóshesinen Sovetskaıa kóshesine deıin, 1,4 shaqyrymy jańartylady. Bul jumystar ınvestıtsııalyq baǵdarlama aıasynda 2020 jyldyń qyrkúıek aıyna deıin atqarylady. Osy maqsatqa 950,3 mln teńge jumsalady dep josparlanǵan.

Jumystardy merdiger uıym - «Stroıtelnoe Ýpravlenıe Energostroı» JShS júrgizse, tehnıkalyq baqylaýdy «KazStroıInjınırıng PV» JShS atqarady.

«Jylýmen qamtýdyń ýaqytsha kestesine kóp qabatty 6 turǵyn úı, jeke sektordaǵy 77 úı, mektep pen shaǵyn ortalyq jáne 13 zańdy tulǵa qosylady. Tutynýshylar ózgeristi baıqamaıdy. Óıtkeni jylýmen jáne ystyq sýmen qamtý tıisti deńgeıde júrgiziledi», - deıdi «Petropavl Jylý Jelileri» JShS bas dırektory Andreı Kalınıchev.