Petropavlda júk kóligi men jeńil mashına soqtyǵysyp, bir adam mert boldy
2021 jylǵy 23 qarasha 15:39

Petropavlda júk kóligi men jeńil mashına soqtyǵysyp, bir adam mert boldy

PETROPAVL. QazAqparat – Petropavlda «Ýral» júk kóligi men «LADA Largus» avtokóligi soqtyǵysyp, saldarynan jeńil mashınanyń júrgizýshisi qaza tapty, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, 23 qarasha kúni saǵat 07.48 mınýt ketkende «102» jedel arnasyna Petropavl syrtyndaǵy aınalma jolda jol-kólik apaty bolǵandyǵy týraly habar túsken. Kýágerler «LADA Largus» jáne «Ýral 5557» kólikteriniń soqtyǵysqany týraly habarlaǵan.

Jol-kólik oqıǵasy saldarynan «LADA Largus» júrgizýshisi aýyr jaraqat alyp, oqıǵa ornynda kóz jumdy.

Osy fakti QR Qylmystyq kodeksiniń 345-babynyń 3-bóligi boıynsha Sotqa deıingi tergep-tekserýlerdiń biryńǵaı tizilimine engizildi.

Qazir jol-kólik oqıǵasynyń mán-jaıy men sebepteri anyqtalmaq. Birqatar saraptama taǵaıyndaldy. Júrgizilgen is-sharalardyń nátıjesi boıynsha sońǵy protsessýaldyq sheshim qabyldanady.

Polıtseılerdiń aıtýynsha, dúısenbiden beri SQO joldarynda úsh jol-kólik oqıǵasy tirkeldi. Saldarynan eki adam zardap shegip, bir adam qaza tapty.

Qolaısyz aýa raıyna jáne kóktaıǵaqqa baılanysty polıtseıler jol qozǵalysynyń barlyq qatysýshylarynan joldarda saq bolýdy, jol júrisi erejelerin qatań saqtaýdy suraıdy. Júrgizýshiler jol-kólik oqıǵasyn boldyrmas úshin qaýipsiz qashyqtyqty, búıirlik aralyqty saqtaýy, sondaı-aq, manevr jasaýda abaı bolýy, jyldamdyqty barynsha azaıtýy qajet. Jaıaý júrginshiler joldardan tek ruqsat etilgen oryndardan ótýi tıis.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT