Petropavlda mas kúıde kólik júrgizgen adam 4,5 jylǵa sottaldy
2022 jylǵy 24 mamyr 02:45

Petropavlda mas kúıde kólik júrgizgen adam 4,5 jylǵa sottaldy

PETROPAVL. QazAqparat – Petropavlda kólik basqarýǵa quqy bolmasa da rýlge mas kúıde otyryp, bir adamnyń ólimine taǵy bireýiniń aýyr jaraqat alýyna sebepker bolǵan er adam 4,5 jylǵa sottaldy, dep habarlaıdy QazAqparat tilshisi.

Petropavl qalalyq sotynyń málimetinshe, sottalǵan K. buǵan deıin mas kúıde kólik júrgizgeni úshin kólik basqarý quqyǵynan aıyrylǵan. Biraq bul oǵan rýlge qaıta mas kúıde otyrýǵa toqtaý salmaǵan. Saldarynan oblys ortalyǵyndaǵy kóshelerdiń birinde baǵdarsham baǵanyna soǵyldy. Jol-kólik oqıǵasynda bir adam qaza tapty, taǵy bireýiniń densaýlyǵyna aýyr zaqym keldi.

Sot otyrysynda zardap shegýshilerdiń ruqsatymen prokýror men K.-nyń arasynda protsessýaldyq kelisim jasaldy. Onyń talaby boıynsha prokýror sottalýshyǵa 4 jyl 6 aı jaza kesýdi jáne ómir boıyna kólik júrgizý quqyǵynan aıyrýdy surady. K.-da óz tarapynan tıisti talaptardy oryndady.

Jalpy qylmystyń bul túrine 7 jyldan 9 jylǵa deıin bas bostandyǵynan jáne ómir boıyna belgili bir laýazymdarǵa taǵaıyndalý, belgili bir qyzmetpen aınalysý quqyǵynan aıyrý kózdelgen. Alaıda protsessýaldyq kelisimge kelgen jaǵdaıda maksımaldy jaza ½-den aspaýy kerek, ıaǵnı 4 jyl 6 aı jaza qarastyrylǵan.

Petropavl qalalyq soty K.-ny 4,5 jylǵa bas bostandyǵynan jáne ómir boıyna kólik basqarý quqyǵynan aıyrdy. Sottalǵan jazasyn qylmystyq-atqarý júıesiniń ortasha qaýipsizdiktegi mekemesinde óteıdi.

Buǵan deıin Soltústik Qazaqstan oblysynda bıyl kólikti qaıta mas kúıde basqarǵan 27 adamǵa qylmystyq is qozǵalyp, 10-y bas bostandyǵynan aıyrylǵanyn aıtqan edik.


Jańalyqtar

MURAǴAT