Petropavlda elektr qýatyn taratatyn uıym tutynýshylarǵa qaryz bolyp qaldy
2022 jylǵy 30 maýsym 18:56

Petropavlda elektr qýatyn taratatyn uıym tutynýshylarǵa qaryz bolyp qaldy

PETROPAVL. QazAqparat – Soltústik Qazaqstan oblystyq sotynyń azamattyq ister jónindegi sot alqasy tutynýshylardan zańsyz tólem alyp kelgen «Sevkazenergosbyt» JShS-ne qatysty birinshi satydaǵy sottyń sheshimin ózgerissiz, apellıatsııalyq shaǵymdy qanaǵattandyrýsyz qaldyrdy, dep habarlaıdy QazAqparat tilshisi.

Energııa tasymalyna ketetin shyǵyndardy halyq esebinen ótep kelgen «Sevkazenergosbyt» JShS-gi endi tutynýshylarǵa qaryz bolyp otyr.

Sot kompanııany jylý energııasynyń shyǵyny úshin halyqtan alynǵan tólemdi qaıtarýǵa mindettedi.

Ulttyq ekonomıka mınıstrligi Tabıǵı monopolııalardy retteý komıtetiniń oblys boıynsha departamentine turǵyndardan «Sevkazenergosbyt» jaýapkershiligi shekteýli seriktestigine qatysty kommýnaldyq tólemderdi esepteý tártibiniń zańǵa saı emestigi jóninde 2021 jyldyń qarasha aıynan birneshe ret shaǵym túsken.

Kompanııa teńgerimdik tıesilik shekarasynda ornalasqan eseptegish quraldary bar petropavldyqtardan jylý ysyraptary úshin tólem alyp kelgen.

Departament óz tarapynan tutynýshylardyń quqyqtaryn qorǵaý maqsatynda oblystyń mamandandyrylǵan aýdanaralyq ekonomıkalyq sotyna talap aryz berdi.

Aryzda tarıftik vedomstvo jylý energııasy ysyrabynyń esebin jaramsyz dep tanýdy, esepteýler júrgizýdi toqtatýdy jáne 2020-2021 jyldary Petropavl turǵyndaryna qaıta esepteý júrgizý talap etildi.

Sot «Sevkazenergosbyt» JShS-niń tutynýshylarǵa jylý shyǵyndary úshin esep júrgizý áreketterin zańsyz dep tanyp, kompanııaǵa 2020-2021 jyldar kezeńinde jylý shyǵyndary úshin eseptelgen somany qaıtarýdy, esepteý jumystaryn toqtatýdy mindettedi.

Bul sheshimnen keıin tabıǵı monopolııalar sýbektileri apellıatsııalyq shaǵymdar berdi.

2022 jylǵy 29 maýsymda oblystyq sottyń azamattyq ister jónindegi sot alqasy birinshi satydaǵy sottyń sheshimin ózgerissiz, apellıatsııalyq shaǵymdy qanaǵattandyrýsyz qaldyrdy.


Jańalyqtar

Úrdis

MURAǴAT