Petropavlda 47 jastaǵy áıel balasyna 2,5 mln teńge alımentin tólemeı júr
2022 jylǵy 1 shilde 03:28

Petropavlda 47 jastaǵy áıel balasyna 2,5 mln teńge alımentin tólemeı júr

PETROPAVL. QazAqparat – Soltústik Qazaqstan oblysynyń kóshi-qon qyzmeti alıment tóleýden jaltarǵan 98 adamdy izdestirip jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavldyń 47 jastaǵy turǵyny 2020 jyldan bastap balasyn kútip-baqqan mekemege qarajat aýdarmaǵan.

Jeke basynyń jaǵdaıyn jasaý úshin astanaǵa ketken áıeldiń qaryzy osy aralyqta shamamen 2,5 mln teńgege jetken. Ózdiginen bereshekti qaıtarýǵa asyqpaǵan boryshkerdiń júrgen jerin óńirdiń mıgratsııalyq qyzmet mamandary anyqtady.

Áıel boryshkerlerdi, alıment tólemeýshilerdi jáne týystyq baılanysyn joǵaltqan adamdardy izdestirý boıynsha ótip jatqan aktsııa barysynda tabyldy.

Qazirgi ýaqytta qaryzdy óndirip alý úshin polıtseıler materıaldardy jeke sot oryndaýshylaryna berýge daıyndap jatyr.

Aktsııa bastalǵan ýaqytta SQO PD Kóshi-qon qyzmeti qyzmetkerleriniń tiziminde 98 adam bolǵan.

Olardyń jartysy – balalaryn kútip-baǵý boıynsha mindetterin oryndamaıtyn ata-analar.

«Aktsııa barysynda qyzmetkerler izdeýdegi adamdardyń týystary men tanystarynyń meken-jaılaryn tekseredi. Basqa da izdeý ádisteri qoldanylady. Buryn olar ákimshilik jaýapkershilikke tartylǵandyqtan, tólem jasaýdan jaltarǵan adamdardyń meken-jaılaryn anyqtaý qıyn emes. Qabyldanǵan keshendi sharalardyń nátıjesinde eki kúndik is-sharanyń qorytyndysy boıynsha izdeýdegi 16 adam, onyń ishinde 5 boryshker men týystyq baılanysyn joǵaltqan 1 adam anyqtaldy». - deıdi SQO PD Kóshi-qon qyzmeti basqarmasynyń bastyǵy Talǵat Ábilov.

Aktsııa maýsymnyń 27-29-y aralyǵynda ótti.

Buǵan deıin SQO-da tártip saqshylarynyń túngi ýaqytta kóshede júrgen jasóspirimderdi anyqtaý úshin reıdke shyqqanyn aıtqan edik. Tek bir túnde eresektersiz kóshede qańǵyrǵan 26 jasóspirim anyqtaldy. Kámeletke tolmaǵandardy tárbıeleý boıynsha mindetterin atqarmaǵany úshin 8 ata-ana jaýapqa tartyldy.

Sondaı-aq, Petropavlda jarylǵysh qurylǵy týraly jalǵan habar berip, turǵyndar men arnaıy qyzmetterdi «aıaǵyna tik turǵyzǵan» er adam bir jylǵa bas bostandyǵynan aıyryldy.


Uqsas jańalyqtar

Jańalyqtar

Úrdis

MURAǴAT