Petropavl oqýshylary jańa mekteptiń sýyq synyptarynda oqýǵa májbúr

2022 jylǵy 30 qarasha, 19:15
Petropavl oqýshylary jańa mekteptiń sýyq synyptarynda oqýǵa májbúr

PETROPAVL. QazAqparat – Petropavldaǵy M. Jumabaev atyndaǵy IT mektep-lıtseıinde jylýdy qalpyna keltirý jumystary bastaldy. Birer kún buryn ata-analar jańadan ashylǵan oqý ornynyń sýyqtyǵyn aıtyp, shaǵymdanǵan edi, dep habarlaıdy QazAqparat tilshisi.

Petropavldaǵy M.Jumabaev atyndaǵy ІT mektep-lıtseıi aıazǵa tótep bere almady. Sýyqtyń kelýimen ǵımarattyń keı bólmelerinde aýa temperatýrasy +15 gradýsqa deıin tómendegen. Búrseń qaqqan balalaryn aıaǵan ata-analardyń biri bul máseleni áleýmettik jelide kóterip, shaǵymdanǵan edi.

Búgin Soltústik Qazaqstan oblysynyń Sybaılas jemqorlyqqa qarsy qyzmeti Petropavldaǵy atalǵan bilim ordasynda jylý tapshylyǵyn joıýǵa qatysty jumystardyń qolǵa alynǵanyn habarlady.

SQO boıynsha Sybaılas jemqorlyqqa qarsy is-qımyl departamenti basshysynyń birinshi orynbasary Aıdos Júnisov oqý ornyna baryp, máselemen tanysty.

Jylý júıesin tekserý kezinde jylý toraby shtattyq rejımde jumys isteıtini anyqtalǵanymen, buryshta ornalasqan synyptarda temperatýranyń 15 gradýsqa deıin tómendeýine áser etetin birqatar kemshilikterdiń de joq emestigine kóz jetkizildi.

Petropavl qalasy ákiminiń orynbasary, Qurylys basqarmasy men merdiger uıymnyń basshylyǵy qatysqan talqylaý barysynda qalyptasqan problemany túzetý boıynsha birqatar naqty tapsyrma berildi.

«Balalar aýyrý úshin emes, bilim alý úshin mektepke barady. Merdiger uıymdar qysqa merzimde kemshilikterdi joıyp, sabaqtardy ótkizý úshin qolaıly temperatýrany qamtamasyz etýi qajet. Ol úshin barlyq qajetti sharany qabyldaýy tıis. Bul máseleni Sybaılas jemqorlyqqa qarsy qyzmet erekshe baqylaýda ustaıtyn bolady», - dedi Aıdos Júnisov.

Aıta keteıik, 900 oqýshyǵa shaqtalǵan M. Jumabaev atyndaǵy ІT mektep-lıtseıin 2021 jyly «Soltústik Qazaqstan oblysy ákimdiginiń Qurylys, sáýlet jáne qala qurylysy basqarmasy» KMM tapsyrysy boıynsha «Qurylys - Servıs SK» JShS saldy.


Uqsas jańalyqtar
Seriktester jańalyqtary

Jańalyqtar