Paıdalanylmaıtyn ańshylyq alqaptardy memleketke qaıtarýdy retteý kerek - Senat
2022 jylǵy 23 maýsym 15:59

Paıdalanylmaıtyn ańshylyq alqaptardy memleketke qaıtarýdy retteý kerek - Senat

NUR-SULTAN. QazAqparat – Senattyń jalpy otyrysynda depýtat Janbolat Jórgenbaev Almaty jáne Jetisý oblystaryndaǵy jerdiń tıimdi ıgerilmeýi men jaıylym tapshylyǵy máselesin kóterdi, dep habarlaıdy QazAqparat tilshisi.

Senatordyń keltirgen derekterine qaraǵanda, atalǵan óńirlerde jaıylymdardyń basym bóligi ańshylyq sharýashylyqtarǵa berilip ketken. Atalǵan aımaqtardyń aýmaǵynda 132 ańshylyq alqap bar, olardyń jeriniń jalpy kólemi 5 mln gektardy quraıdy. Sonymen qatar, óńirde jaıylymdyq jerlerdiń tapshylyǵy da baıqalyp otyr. Dál osy kezde malshylardyń óz maldaryn jaıatyn jeri joq.

«Qoldanystaǵy zańdarǵa sáıkes, ańshylyq alqaptar 10-49 jylǵa deıin ańshylyq sharýashylyqtarǵa ýaqytsha jer paıdalaný quqyǵymen beriledi. Bul rette, osyndaı alqaptardy paıdalanbaǵany úshin memleketke qaıtaryp alý múmkin bolmaı otyr. Sebebi osy másele tıisti zańnamalarda rettelmegen», - dedi senator Janbolat Jórgenbaev Úkimet basshysy Álıhan Smaıylovtyń atyna joldaǵan saýalynda.

Depýtat sonymen qatar keıbir ań aýlaý sharýashylyqtary jeke adamdardyń nemese shaǵyn toptardyń múddesi úshin ǵana paıdalanylatynyn, sondyqtan mundaı ań aýlaý serýenderiniń úlken áleýmettik jáne ekonomıkalyq mańyzy joq ekenin atap ótti. Ásirese, mal jaıýǵa arnalǵan jaıylymdar tapshy bolyp otyrǵan kezde onyń qısyny da joq.

Janbolat Jorgenbaev osyǵan baılanysty ıgerilmegen nemese paıdalanylmaıtyn jerlerdi tekserip, túgendeýdi, sondaı-aq ań aýlaýǵa arnalǵan jerlerdi bekitý kezinde jergilikti halyqtyń mal jaıý nemese shóp shabý máselelerin eskerýdi surady.

Senator ańshylyq sharýashylyqtary aýmaǵyndaǵy sý kózderin tazartý jáne aýmaqty órtten qorǵaýdy máselelerin de kóterdi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT