Pavlodarlyq Imanbektiń «Roses» remıksi Billboard chartynda kósh bastady

NUR-SULTAN. QazAqparat – Qazaqstandyq mýzykant Imanbek Zeıkenovtiń SAINt JHN atty ánshiniń «Roses» kompozıtsııasyna jazǵan remıksi AQSh-tyń Billboard mýzykalyq jýrnalynda top jardy, dep habarlaıdy QazAqparat tilshisi.

Bul tanymal remıks jyl qorytyndysy boıynsha «Úzdik bı/elektronıkalyq ánder» sanatynda birinshi orynda tur.

Imanbek Remix laqap atymen tanymal Imanbek Zeıkenov – aqsýlyq dıdjeı jáne mýzykalyq prodıýser. Ol Saint jhn «Roses» ánine jazǵan remıksten keıin tanymal boldy. Bul trek «Úzdik remıks» nomınatsııasynda 2020 jylǵy Gremmı syılyǵyna usynyldy.

Imanbek Zeıkenov qazir de Aqsý qalasynda ata-anasymen birge turyp jatyr. Bıyl ol Toraıǵyrov ýnıversıtetine oqýǵa tústi, biraq qazir qashyqtan oqıdy. Mýzykanttyń aıtýynsha, tanymal bolyp ketken «Roses» remıksin jasaý úshin bar bolǵany 2 saǵat 20 mınýt ýaqyty ketken.

Aıta ketsek, «Gremmı» syılyǵynyń jeńimpazdaryn jarııalaý 2021 jyldyń 31 qańtarynda ótedi. Al 20 jastaǵy mýzykantymyz tanymal álemdik ártistermen birlesip, ortaq joba daıyndap jatyr.

Foto: instagram.com/imanbekmusic