Pavlodarda zııaly qaýym ókilderi elordany kóshirý kezindegi oqıǵalardy eske aldy
2022 jylǵy 6 shilde 23:37

Pavlodarda zııaly qaýym ókilderi elordany kóshirý kezindegi oqıǵalardy eske aldy

PAVLODAR. QazAqparat – Pavlodar qalalyq ortalyq kitaphanasynyń O.Súleımenov atyndaǵy oqý zalynda «Elorda - tarıh aınasynda» atty tarıhı shara ótti, dep habarlaıdy @Pavlodarnews.kz saıtyna silteme jasap.

Jıynǵa astanamyzdyń Almatydan Aqmolaǵa kóshirilgen sátinen bastap qadamyna kýá bolyp kele jatqan zııaly qaýym ókilderi men elordamyzben birge ósip, órkendep kele jatqan jastar qaýymy, oblystyq tótenshe jaǵdaılar departamentiniń qyzmetkerleri, «Jasyl el» stýdenttik qurylys jáne jastar jasaqtary shtabynyń ókilderi qatysty.

Shara barysynda elordamyzǵa arnalǵan «El júregi – astana» atty beınefılm kórsetilip, án óneriniń oblystyq laýreaty Quralaı Ýaqpaeva án shyrqady.
Jıynda Qazaqstan Jýrnalıster odaǵynyń múshesi, Maı aýdanynyń Qurmetti azamaty, «Aqsaqaldar taǵylymy» qoǵamdyq birlestiginiń múshesi Rashıd Bektemirov el astanasyn kóshirý máselesi úsh jyl qarastyrylǵanyn atap ótti.
- Sol kezdegi Prezıdentimiz 1994 jyly usynys jasap, depýtattar 1997 jyly qoldaǵan bolatyn. Ol kezde halyqta jaǵdaı joq, turmysy nashar boldy. Onsyz da jaǵdaı nashar kezde bul kósh qajet emes degen adamdar da boldy. Al, qazir elordamyzben álemge maqtana alamyz, - dedi Rashıd Bektemirov.

Sonymen qatar, Qazaqstan Jýrnalıster odaǵynyń múshesi, aýdarmashy Serik Satybaldın el arasyndaǵy maqaldyń astanamyzǵa baılanysty ózgergenin tilge tıek etti.
- Kezinde «nemister – Germanııaǵa, qazaqtar – Ekibastuzǵa kóship jatyr» deıtin edik. Qazir «qazaqtar astanaǵa kóship jatyr» deıtin boldyq. Elimizdiń ár óńirinen kóbi osy elordaǵa qonys aýdarýda. Odan bólek, elorda turǵyndarynyń basym bóligi – qazaqtar. Osyǵan qarap qýanasyń. Elimizdiń júregi – elordada bári qazaqsha bolsa, qalǵan óńirler de túzeler, - dedi Serik Satybaldın.

Atalmysh sharaǵa Aqsý qalasynyń qurmetti azamaty, Qazaqstan Jýrnalıster odaǵynyń múshesi Svetlana Kondykerova, Pavlodar oblystyq «Nur-Ana álemi» qoǵamdyq birlestiginiń tóraıymy Baqytjamal Maksılova da qatysyp, astanamyz jaıly óz estelikterimen bólisti.
Sondaı-aq kitaphana qoryndaǵy kitaptardan jáne merzimdi basylymdardan daıyndalǵan «Eńsesi bıik Elorda» atty kitap kórmesi uıymdastyryldy.

Uqsas jańalyqtar

Jańalyqtar

Úrdis

MURAǴAT