Pavlodarda qazaqsha bilim beretin alǵashqy mektep-lıtseı boı kóterdi
2022 jylǵy 28 maýsym 19:41

Pavlodarda qazaqsha bilim beretin alǵashqy mektep-lıtseı boı kóterdi

PAVLODAR. QazAqparat - Pavlodar qalasynda memlekettik tilde bilim beretin jańa mektep-lıtseı boı kóterdi. Qazir oqýshylar qabyldanyp jatyr. Jańa oqý jylynan bastap esigi aıqara ashylady, dep habarlaıdy QazAqparat.

Bul týraly búgin Pavlodar oblysynyń ákimi Ábilqaıyr Sqaqov respýblıkalyq BAQ ókilderine bergen brıfıng barysynda málim etti.

Ertis-Baıan óńirinde jyl sanap qazaq tildi mektepterge degen suranys artyp keledi. Resmı statıstıkaǵa júginsek, búginde oblysta barlyǵy 359 mektep bolsa, onyń 138-i, ıaǵnı 39%-ynyń oqytý tili – qazaq tili.

Sońǵy bes jylda memlekettik tilde bilim beretin mektepterdiń qatary artqan. Sonyń ishinde tórt aralas mektep tolyǵymen qazaq tiline aýysty.

Endi mine, bul tizim taǵy bir sý jańa bilim ordasymen tolyqpaq. Pavlodar qalasynda jańadan salynǵan «Saryarqa» shaǵynaýdanyndaǵy mekteptiń tusaýy bıyl kúzde kesiledi. Bul oblys ortalyǵyndaǵy lıtseı dárejesi bar alǵashqy qazaqsha mektep bolmaq.

«Mektep qurylysy tolyǵymen aıaqtaldy. Munda bir aýysymda 650 oqýshy bilim alady. Nysan aldaǵy jańa oqý jylynan resmı jumysyn bastaıdy. Qazir oqýshylardy tirkeý boıynsha ótinish qabyldanyp jatyr. Áleýmettik, bilim salasyna jaýapty mamandar tıisti taldaý júrgizdi. Suranysqa oraı bul mektepte memlekettik tilde bilim beriledi», - dedi aımaq basshysy Á.Sqaqov respýblıkalyq ortalyq kommýnıkatsııalar qyzmetinde sóılegen sózinde.

Qazaq tildi mektepterge suranys artqanyn Pavlodar oblysynyń bilim basqarmasyndaǵylar keltirgen myna bir mysaldan baıqaýǵa bolady.

Pavlodar qalasynda Baýyrjan Momyshuly atyndaǵy bilim ordasynda 700-ge jýyq oqýshy artyq oqıdy. ıAǵnı, júkteme tym joǵary. Mekteptiń úsh aýysymǵa ótý qaýpi týyndap otyr.

Bul ondaǵy bilim sapasyna, sanıtarlyq jaǵdaıǵa keri áserin tıgizýi múmkin.

Sondyqtan atalǵan bilim ordasynyń biraz oqýshylary ata-anasynyń kelisimimen «Saryarqa» shaǵynaýdanyndaǵy jańadan boı kótergen lıtseı-mektebine aýystyrylmaq. Bul eki mektep bir-birine jaqyn ornalasqan.

Jańalyqtar

Úrdis

MURAǴAT