Pavlodarda avtobýs tasymaldaýshylary jaldaý aqysyn arzandatýdy talap etti

PAVLODAR. QazAqparat – №1 avtobýs parkinde oblys ákiminiń orynbasary, qala ákimi, kásiporyn basshylary men avtobýsty jalǵa alýshylar kezdesti. Osy sharadan keıin tasymaldaýshylar máselesin jumys tártibinde qarap, qolaıly kelisimge kelý jóninde sheshim qabyldandy, dep habarlaıdy QazAqparat tilshisi.

Uqsas jańalyqtar

Aqtóbede júrgizýshi kýáligi joq adam mektep oqýshylaryn tasymaldaǵan

Astanada osy jeksenbide avtobýs júrmeıdi

«Tańǵy saǵat besten bastap birinshi avtobýs parkinde qalalyq marshrýttarǵa kólik shyǵarý jumysy bastaldy. Tańerteńnen bastap júrgizýshilerdi medıtsına qyzmetkerleri tekseredi, sondaı-aq kólik quraldaryna tekserý júrgizildi» dep habarlady Pavlodar qalasy ákiminiń baspasóz qyzmeti.

Jergilikti bılik ókilderiniń habarlaýynsha, búginde 11 qalalyq marshrýt boıynsha №1 avtobýs parkiniń úlken klastaǵy 49 avtobýsy men shaǵyn klastaǵy 12 kóligi jumys isteıdi.

Sondaı-aq, júrgizýshiler quramynyń park basshylyǵymen kezdesýi uıymdastyryldy, onda júrgizýshilerdiń talaptary men kásiporynnyń jaǵdaıy aıtyldy.

«Júrgizýshiler jaldaý aqysyn tómendetýdi nemese eńbek qatynasyn jalaqyǵa aýdarýdy talap etti», - dep habarlady baspasóz qyzmeti.

«Jelidegi jaǵdaı qıyn bolsa da, osy baǵyttar boıynsha kúni boıy jumys jalǵasty. 10, 21, 22 marshrýttaryndaǵy avtobýstardyń 20 paıyzy jelide qalyp, qala turǵyndaryn tasymaldady», - dep atap ótti ákimdik.

Osy kezdesýdiń qorytyndysy boıynsha 26 qarashada osy baǵyttardaǵy avtobýstardyń jalpy sanynyń kem degende 60 paıyzyn jiberý, tasymaldaýshylar máselesin jumys tártibinde qaraý jáne qalalyq marshrýttarda avtobýs tapshylyǵyn týǵyzbaı, qolaıly kelisimge kelý jóninde sheshim qabyldandy.