Pavlodar oblysynyń Qarttar úıinde 28 adam koronavırýs juqtyrdy

AQSÝ. QazAqparat – Pavlodar oblysynyń Aqsý qalasyndaǵy Qarttar men múgedekterge arnalǵan áleýmettik ortalyqta 28 adam koronavırýs juqtyrdy, dep habarlaıdy QazAqparat tilshisi.

Pavlodar oblysy sanıtarııalyq-epıdemıologııalyq baqylaý departamenti ókilderiniń aıtýynsha, alǵashqy jaǵdaı 28 qarasha kúni tirkelgen. Ortalyqta sanıtar bolyp jumys isteıtin qyzmetker tekseristen ótý úshin emhanaǵa júgingen kezde, odan koronavırýs anyqtalǵan. Sol kúni ortalyq sanıtarymen jaqyn baılanysta bolǵan eki qyzmetker men qamqorlyqqa alynǵan 34 adam PTR-testten ótti.

29 qarashada mekemeniń úılestirýshisi emhananyń mobıldi tobyna júgingen. Barlyǵy 70 adam PTR testileýden ótti, onyń 69-y qamqorlyqqa alynǵandar.

«4 jeltoqsandaǵy jaǵdaı boıynsha Aqsý qalasyndaǵy Qarttar men múgedekterge arnaıy áleýmettik qyzmet kórsetý ortalyǵynda COVID-19 juqtyrýdyń 28 oqıǵasy tirkeldi. Onyń 22-si - qamqorlyqqa alynǵandar, 19-ynda aýrý sımptomsyz ótip jatyr. Sonymen qatar alty qyzmetkerden koronavırýs anyqtaldy, olardyń ekeýinde indet belgileri bar. Syrqattanǵan azamattardyń barlyǵy aýrýhanaǵa jatqyzyldy. Taǵy tórt qyzmetker – úı karantıninde», - dep atap ótti mekeme ókilderi.

Jalpy mekemede 195 turǵyn men 38 qyzmetker bar. Barlyǵy COVID-19-ǵa testten ótti.

Eske sala ketsek, epıdemıologııalyq jaǵdaıdyń nasharlaýyna baılanysty Pavlodar, Ekibastuz jáne Aqsý qalalarynda mektepterdegi kezekshi synyptar jabylyp jatyr.

Pavlodar oblysy koronavırýs indeti boıynsha «qyzyl aımaqta» tur. Qazirgi ýaqytta 6780 adam vırýs juqtyrǵan. Olardyń 526-y Aqsý qalasynda.