Pavlodar oblysynda jyl sońyna deıin 36 avtojol jóndeledi
2022 jylǵy 23 maýsym 22:30

Pavlodar oblysynda jyl sońyna deıin 36 avtojol jóndeledi

NUR-SULTAN. QazAqparat - Pavlodar oblysynda jol jóndeý jumystary oblystyq jáne aýdandyq mańyzy bar 287 shaqyrym jolǵa júrgiziledi. Atap aıtqanda, 33 nysanda ortasha, 2 nysanda kúrdeli jóndeý jáne 1 jol nysanyn rekonstrýktsııalaý josparlanǵan, dep habarlaıdy QR IIDM baspasóz qyzmeti.

Budan bólek, jalpy uzyndyǵy 50 shaqyrym bolatyn týrıstik baǵyttaǵy avtomobıl joldaryna ortasha jóndeý júrgizý jalǵasýda: «Qarajar-ıÝjnoe», «Qarashat-Novaıa Jaıma», «Baıanaýyl-Ýgolnoe». Búginge deıin atalǵan ýchaskelerde qoldanystaǵy qıyrshyq tas jabynyn resaıklerleý, tsementpen nyǵaıtý, suıyq bıtýmdy quıý, sý ótkizetin qubyrlardy ornatý jáne jol jıekterin bekemdeý júrgizildi.

Aıta ketý kerek, aǵymdaǵy qurylys maýsymynda aýdandar arasyndaǵy qashyqtyqty qysqartýǵa baǵyttalǵan aýdandyq mańyzy bar avtojoldarǵa da basymdyq beriledi. Atap aıtqanda, Maı jáne Baıanaýyl aýdandaryn qosatyn «Aqshıman-Leker» jáne Ekibastuz qalasy, Aqtoǵaı jáne Ertis aýdandary arasynda ótetin «Razýmovka-Basqamys» aýdandyq mańyzy bar joldary ortasha jóndeýmen qamtylǵan. Qazirge deıin tsementpen nyǵaıtý jáne sýyq asfaltbeton qospasynan jabyn ornatý boıynsha jumystar júrgizildi.

2022 jyly, sondaı-aq, Ekibastuz qalasynda «GRES-1-Basqamys» avtomobıl jolyn rekonstrýktsııalaý jobasy iske asyrylýda. Sonymen qatar, Sharbaqty aýdanynda «Galkıno-Jańaaýyl-Alekseevka» jolynyń 10 shaqyrymynda asfalt jabyny jańartylýda. Barlyq jumystar bekitilgen óndiristik kestege sáıkes júrgizilýde.

Sonymen qatar, aǵymdaǵy jyly «Ekibastuz-GRES2», «Ivanovka-Trofımovka», «Aqtoǵaı-Sholaqsor», «Belovka-Qalqaman» oblystyq mańyzy bar tórt joldy ortasha jóndeý jumystary júrgizilip jatyr. Budan bólek, Maı aýdanyndaǵy «Qyzyl-Oktıabr-Jańa Aqshıman» jolynyń 29 shaqyrymy jáne «Qaraterek-Qylysh» avtojolynyń 12 shaqyrymy jóndeýmen qamtyldy.

Júrgiziletin jumystardyń sapasy tapsyrys berýshiniń, tehnıkalyq qadaǵalaýdyń jáne «Jol aktıvteriniń ulttyq sapa ortalyǵy» RMK-nyń turaqty baqylaýynda.

Joǵaryda atalǵan jumystardyń qorytyndysy boıynsha Pavlodar oblysyndaǵy joldardyń normatıvtik jaǵdaıdaǵy úlesin 93%-ǵa deıin jetkizý kózdelgen.


Uqsas jańalyqtar

Jańalyqtar

Úrdis

MURAǴAT