Pavlodar oblysynda jas jigit ózin tastap ketken qyzdyń ata-anasyn pyshaqtap óltirgen
2022 jylǵy 5 shilde 01:07

Pavlodar oblysynda jas jigit ózin tastap ketken qyzdyń ata-anasyn pyshaqtap óltirgen

NUR-SULTAN. QazAqparat – Pavlodar oblysynda jas jigit burynǵy qyzynyń anasy men ógeı ákesin pyshaqtap óltirdi, dep habarlaıdy Pavlodarnews.kz.

Qaıǵyly jaǵdaı Pavlodar oblysy Tereńkól aýdanynyń Beregovoe aýylynda boldy. 22 jastaǵy jigit ózin tastap ketken qyzdyń anasy men ógeı ákesine pyshaqpen shabýyl jasaǵan. Ekeýi birneshe pyshaq jaraqatynan qaıtys boldy.
16 jasar Alına sol túni Pavlodardaǵy týystarynyń úıinde qonǵandyqtan aman qalǵan.

Oblystyq polıtsııa departamenti baspasóz qyzmetiniń málimetinshe, 3 shilde kúni saǵat 02:10-da Mır kóshesindegi jeke úıdiń aýlasynan 46 jastaǵy áıel men 48 jastaǵy er adamnyń pyshaqtalǵan denesi tabyldy.

«Marqumnyń kámeletke tolmaǵan balasy aman qaldy, ol bólmelerdiń birine tyǵylyp qalǵan. Atalǵan qylmys boıynsha kúdikti retinde 22 jastaǵy aýyl turǵyny anyqtalyp, ustaldy. Oqıǵa ornynda tıisti tergeý amaldary júrgizilýde», - dedi departamentten.
«Shamamen bir aı buryn men onyń esirtki qoldanatynyn bildim, sondyqtan onymen qarym-qatynasty toqtatýdy sheshtim. Ol qarsy boldy jáne meniń áli bul sheshimim úshin qatty ókinetinimdi aıtty, - dep eske alady Alına. - 2 shildede men Pavlodarda boldym, kolledjge túsý úshin qujattar tapsyrýǵa daıyndaldym. Túnde tátem maǵan qońyraý shalyp, shuǵyl túrde oralýym kerek ekenin aıtty. Úıde anam men ógeı ákemdi óltirip ketkenin bildim».

Qyzdyń sózinshe, týystary oǵan oqıǵanyń mán-jaıyn aıtyp bergen.

«Sol túni anam, ógeı ákem jáne meniń 13 jasar baýyrym úıde boldy. Olar túngi saǵat birge qaraı otshashýdy estip, kóshege shyqqan. Baýyrym barǵysy kelmedi jáne úıde qaldy. Biraz ýaqyttan keıin anam úıge júgirip kelip, oǵan jasyryn dep aıtqan. Baýyrymdy qutqarýǵa tyrysyp, kómek surap júgirgen. Ol alleıaǵa jetken kezde burynǵy jigitim ony qýyp jetken. Anam pyshaq jaraqatynan qaıtys boldy. Buǵan deıin ol anamdy qorǵaýǵa tyrysqan ógeı ákemdi de óltirgen», - dedi Alına.

Atalǵan fakti boıynsha QR QK-niń 99-baby 2-bóligine sáıkes (Eki jáne odan da kóp adamdy óltirý) boıynsha sotqa deıingi tergeý júrgizilýde. Qylmystyń mán-jaıy tergeý barysynda anyqtalady.

Atalǵan qylmysty tergeýmen Pavlodar oblysy polıtsııa departamentiniń tergeý basqarmasy aınalysady. Іs boıynsha protsessýaldy prokýror taǵaıyndaldy.

Uqsas jańalyqtar
Seriktester jańalyqtary

Jańalyqtar

Úrdis

MURAǴAT