Parlamenttiń osy sessııasy jaýapty kezeńde ótti – Erlan Qoshanov
2022 jylǵy 30 maýsym 11:49

Parlamenttiń osy sessııasy jaýapty kezeńde ótti – Erlan Qoshanov

NUR-SULTAN. QazAqparat – Búgin Parlament palatalarynyń birlesken otyrysynda Májilis tóraǵasy Erlan Qoshanov Parlamenttiń osy sessııasy barsha qazaqstandyq qoǵam úshin aıryqsha jaýapty kezeńde ótkenin aıtty, dep habarlaıdy QazAqparat tilshisi.

«Búgin biz jetinshi saılanǵan Qazaqstan Respýblıkasy Parlamentiniń ekinshi sessııasynyń jumysyn aıaqtap, qorytyndylap otyrmyz. Osy sessııanyń negizgi strategııalyq basymdyqtaryn Qazaqstan Respýblıkasynyń Prezıdenti Qasym-Jomart Kemeluly Toqaev ótken jylǵy qyrkúıekte sessııanyń ashylýynda, sondaı-aq Qazaqstan halqyna Joldaýynda aıqyndap bergen bolatyn. Ótken kezeńde Parlamenttiń qyzmeti belgili oqıǵalar men mańyzdy sheshimderge toly boldy. Birinshiden, bıylǵy sessııa Qazaqstan Respýblıkasy Táýelsizdiginiń 30 jyldyǵy aıasynda ótti. Bul elimizdiń basty memlekettik merekesi ǵana emes, barsha qazaqstandyqtardy biriktiretin ulttyq tarıhı mańyzdy kezeń. Ekinshiden, Táýelsizdiktiń 30 jyldyǵyndaǵy mańyzdy kezeńderdiń biri – Qazaqstan Respýblıkasy Parlamentiniń 25 jyldyq mereıtoıy. Parlamenttiń qalyptasýy men damýy egemen Qazaqstannyń taǵdyrymen tyǵyz baılanysty. Úshinshiden, el damýyndaǵy jańa kezeńniń bastalýyn bildiretin Konstıtýtsııaǵa túzetýler jónindegi respýblıkalyq referendým boldy», - dedi E. Qoshanov.

Osy oraıda ol Parlamenttiń osy sessııasy barsha qazaqstandyq qoǵam úshin aıryqsha jaýapty kezeńde ótkenin atap ótti.

«Eń aldymen, biz eki jylǵa sozylǵan koronavırýs pandemııasyn eńserip qana qoımaı, ortaq kúsh-jigerimizdiń arqasynda aıtarlyqtaı nátıjelerge qol jetkizdik. Densaýlyq saqtaý júıesindegi tásilder ózgertildi, bilim berý salasynda oqytýdyń jańa standarttary engizildi, bıznestiń, bank jáne qarjy qurylymdarynyń, qyzmet kórsetý jáne kólik salasynyń jumys formaty ózgerdi. Koronavırýs pandemııasy kezeńindegi shekteý sharalary Parlamenttiń qyzmetine de óz ereksheligin engizdi», - dedi Májilis tóraǵasy.

«Qańtarda elimiz úlken qaterden aman-esen shyqty. Mundaı oqıǵa memleketimizdiń jańa tarıhynda buryn sońdy bolmaǵan. Soǵan saı, der kezinde jáne jedel áreket etý qajet boldy. Memleket basshysy Qasym-Jomart Kemeluly Toqaevtyń jigerli sheshimderi eldi terrorıstik soqqydan aman alyp shyǵyp, jaǵdaıdy qysqa merzim ishinde turaqtandyrdy. Bul bizdiń elimiz ben memleketimizdi saqtaý jolyndaǵy birden-bir durys ári baıypty qadam boldy. Osyndaı kúrdeli kezeńde, Memleket basshysy Parlament qabyrǵasynda Qazaqstan halqyna Joldaý jasap, aýqymdy saıası jańǵyrtý baǵdarlamasyn usyndy. Saıası transformatsııanyń negizgi ózegi – jańa ári ádiletti Qazaqstan qurý, barlyq qazaqstandyqtarǵa birdeı múmkindikter jasaý. Al ótken referendýmnyń qorytyndylary qazaqstandyqtardyń basym kópshiliginiń Prezıdenttiń saıası jańǵyrtý baǵdarlamasyn qoldaıtynyn kórsetti», - dedi Erlan Qoshanov.

Budan buryn habarlanǵandaı, E. Qoshanov ekinshi sessııanyń zańnamalyq kún tártibi aıtarlyqtaı mazmundy bolǵanyn aıtty.

«Máselen, Pralament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessııa kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.


Uqsas jańalyqtar

Jańalyqtar

Úrdis

MURAǴAT