Para alyp sottalǵan Aqtóbeniń bas ekologiniń jazasy kúsheıtildi
2022 jylǵy 19 mamyr 20:38

Para alyp sottalǵan Aqtóbeniń bas ekologiniń jazasy kúsheıtildi

AQTÓBE. QazAqparat - 400 myń teńge para alyp, óz qateligin moıyndaǵan Nurjan Aqqul alǵashynda aıyppulmen qutyldy. Keıin is oblystyq sotta qaralyp, ol úsh jylǵa bas bostandyǵynan aıyryldy, dep habarlaıdy QazAqparat tilshisi.

Aqtóbe oblystyq sotynyń qylmystyq ister jónindegi sot alqasy oblystyq ekologııa departamentiniń burynǵy basshysy Nurjan Aqqulǵa qatysty isti qarady.

Buǵan deıin №2 Aqtóbe qalalyq soty Qylmystyq kodekstiń «Para alý» baby boıynsha Nurjan Aqquldy aıypty dep tanyp, 12 mıllıon teńge aıyppul salǵan bolatyn.

Sonymen birge memlekettik qyzmette jumys isteý quqyǵynan ómir boıyna aıyrdy.

«Sot alqasy qylmystyq istiń qoǵamda asa qaýipti ekenin eskerip, kásibı mamannyń óz antyn buzǵanyn negizge alyp, jazany kúsheıtti. Sottalýshynyń jasy men buryn sottalmaǵany da eskerildi. Qazir ol 61 jasta. Ony 3 jylǵa bas bostandyǵynan aıyrdy. Ómir boıy memlekettik qyzmette, Ulttyq bank salasynda, kvazımemlekettik sektorda eńbek ete almaıdy», - dep habarlaıdy oblystyq sottyń baspasóz qyzmeti.

Sot úkimi zańdy kúshine endi.

Eske salsaq, Nurjan Aqqul 2021 jyldyń jeltoqsan aıynda kásipkerden 400 myń teńge aldy degen kúdikke ilikti.

Ol parany birinshi sanattaǵy obektiler úshin emıssııalardyń qorshaǵan ortaǵa áser etýine ruqsat berýi jáne jalpy qamqorlyq kórsetý úshin alǵan.


Uqsas jańalyqtar

Jańalyqtar

MURAǴAT