Ózbekstan Túrki akademııasy halyqaralyq uıymyna baqylaýshy mártebesin aldy
2022 jylǵy 24 maýsym 17:43

Ózbekstan Túrki akademııasy halyqaralyq uıymyna baqylaýshy mártebesin aldy

NUR-SULTAN. QazAqparat – Búgin Nur-Sultan qalasynda ótken Halyqaralyq Túrki akademııasy Ǵylymı keńesiniń kezekti V otyrysy barysynda Ózbekstan Respýblıkasy halyqaralyq uıymǵa resmı túrde baqylaýshy mártebesine ıe boldy.

Osyǵan qaraı, Halyqaralyq Túrki akademııasynyń ǵımaraty aldynda Ózbekstannyń memlekettik Týyn saltanatty kóterý rásimi ótti, dep habarlaıdy QazAqparat.

Túrki akademııasynyń ǵımaratynda ótken resmı jıynda uıym prezıdenti Darhan Qydyráli Ózbekstan Respýblıkasynyń Qazaqstandaǵy Elshisi Saıdıkram Nııazhodjaevtan Ózbekstannyń Memlekettik týyn qabyldap alyp, arnaıy tý týǵyrǵa saltanatty kóterý rásimin jasady. Osylaısha túrki áleminiń ǵylymı-ıntellektýaldy ortalyǵy sanalatyn Túrki akademııasy irgesin keńeıtip, ǵylymı ıntegratsııa aýqymyn jańa beleske kóterdi.

Aıta ketý kerek, 2019 jyldyń Túrki yntymaqtastyq uıymynyń (sol kezdegi Túrki keńesi) Baký qalasynda ótken 8-shi Sammıttinde Ózbekstan uıymǵa tolyqqandy múshe bolyp qabyldandy. Osyǵan qaraı, yntymaqtystyq aıasynda Ózbekstan tarapy Túrki akademııasyna baqylaýshy memleket mártebesin alý úshin resmı ótinim berdi.

Buǵan deıin Halyqaralyq Túrki akademııasyna Túrki áleminiń elderimen yntymaqtastyq ınstıtýttary arasynda baqylaýshy mártebesine ótinish qabyldaǵan alǵashqy uıym Majarstan bolǵan edi.


Jańalyqtar

Úrdis

MURAǴAT