Ózbekstan «Sardoba» sý qoımasynyń syıymdylyǵyn azaıtýǵa kelisip otyr - mınıstrlik
2022 jylǵy 28 qańtar 17:15

Ózbekstan «Sardoba» sý qoımasynyń syıymdylyǵyn azaıtýǵa kelisip otyr - mınıstrlik

NUR-SULTAN. QazAqparat – QR Ekologııa, geologııa jáne tabıǵı resýrstar vıtse-mınıstri Serik Qojanııazov Ózbekstandaǵy «Sardoba» sý qoımasynan Qazaqstannyń eldi mekenderine qaýip joq ekenin aıtty, habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide mınıstrdiń orynbasaryna «Sardoba» sý qoımasynyń apatynan eki tarap qandaı qorytyndy shyǵarǵany týraly suraq qoıyldy.

«Birinshiden, o basta Ózbekstan tarapy nysandy salǵan kezde bizben kelispedi. Biraq biz jaǵdaıdy baqylap otyrmyz. Basynda onyń jobalyq qýaty 920 mln tekshe metrdeı bolǵan. Sol avarııadan keıin bular byltyr 350 mln tekshe metr sýǵa múmkindik bolady dep, jóndeý jumystaryn jasady. Bıyl sol 350 mln tekshe metr sýdy jınaqtap jatyr», - dedi vıtse-mınıstr.

Aıtýynsha, Ózbekstan atalmysh qoımanyń syıymdylyǵyn qaıta qaraǵan.

«Bolashaqta Ózbekstannyń jospary burynǵy 900 mln tekshe metr emes, 600 mln tekshe metrge deıin aparyp, sonymen toqtatý týraly oılary bar. Biz ony baqylap, qarap otyrmyz. Ázirshe Qazaqstanǵa myna jaǵdaıda qaýip joq degen boljam bar. Bizdiń mamandar da baryp keldi. Ózbek tarapynyń aıtyp otyrǵany da osy», -dedi Serik Qojanııazov.


Jańalyqtar

MURAǴAT