Ózbekstan Prezıdenti Konstıtýtsııaǵa ózgerister engizý boıynsha referendým ótkizýdi usyndy
2022 jylǵy 20 maýsym 21:06

Ózbekstan Prezıdenti Konstıtýtsııaǵa ózgerister engizý boıynsha referendým ótkizýdi usyndy

TAShKENT. QazAqparat – Ózbekstan Prezıdenti Shavkat Mırzıeev Konstıtýtsııalyq komıssııa múshelerimen kezdesýde eldiń Ata zańyna referendým arqyly ózgerister engizýdi usyndy, dep habarlaıdy QazAqparat menshikti tilshisi respýblıka basshysynyń baspasóz qyzmetine silteme jasap.

«Parlament ázirlegen jobany jalpyhalyqtyq talqylaýda qarastyryp, ony referendým arqyly qabyldaýdy usynamyn» , - dedi Shavkat Mırzıeev.

Ol qoldanystaǵy zańnamaǵa sáıkes, Parlamenttiń ózi Konstıtýtsııaǵa ózgertýler engizýge quqyly ekenin, biraq muny halyqtyń erkine súıene otyryp jasaǵan durysyraq bolatynyn atap ótti.

«Meniń oıymsha, eger biz azamattarymyzdyń pikiri men qoldaýyna súıene otyryp, referendým arqyly konstıtýtsııalyq reformany júzege asyratyn bolsaq, onda bul naǵyz halyqtyq Konstıtýtsııa bolady», - dep atap ótti Prezıdent.

Onyń aıtýynsha, bul Konstıtýtsııanyń jalǵyz qaınar kózi jáne avtory – halyq degen qaǵıdaǵa sáıkes keledi.

«Sonda árbir otandasymyz «Ózbekstannyń jańa Konstıtýtsııasy - Meniń Konstıtýtsııam» dep maqtanyshpen aıta alady», - dep túıindedi Shavkat Mırzıeev.

Buǵan deıin Ózbekstan basshysy Konstıtýtsııaǵa ólim jazasyna tyıym salý jáne respýblıka Parlamentiniń ókilettikterin keńeıtý týraly norma engizýdi jaqtaǵan bolatyn.

Ózbekstan Konstıtýtsııasy 1992 jyly 8 jeltoqsanda qabyldanǵan. Osy kezeń ishinde eldiń negizgi zańyna 15 ret túzetýler engizilgen.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT