Jańalyqtar  >
  Sport
Ótken aptadaǵy sport salasyndaǵy erekshe oqıǵalar
2022 jylǵy 14 tamyz 16:21

Ótken aptadaǵy sport salasyndaǵy erekshe oqıǵalar

NUR-SULTAN. QazAqparat – Ótken aptada el sportynda kóptegen jańalyqtar boldy. Fýtboldan qazaqstandyq klýbtar eýrokýbok oıyndarynda básekege tússe, ózge de saıys túrlerinen sańlaqtarymyz júldeli oryndardan kórindi. Keıbirinde qarsylastarǵa ese jiberip qoısaq, endigi birinde mereıimiz ústem boldy. QazAqparat tilshisi sporttaǵy sol oqıǵalardy taǵy bir márte oı sarabynan ótkizip kórdi.

Fýtboldan álem chempıonatynda ózgerister bar

Katarda ótetin fýtboldan álem chempıonaty josparlanǵan kesteden bir kún buryn, ıaǵnı 20 qarashada bastalady.

«FIFA-2022 álem chempıonaty jergilikti jáne sheteldik jankúıerler úshin tipten merekelik sıpatta bastalatyn boldy, óıtkeni qabyldaýshy el Katar endi Ekvadormen jeksenbi, 20 qarasha kúni saǵat 19:00-de (Nur-Sultan ýaqytymen 22:00) kezdesedi. Bılet ıelerine matchtardyń aýystyrylǵany týraly elektrondyq poshta arqyly habarlanady jáne olardyń bıletteri jańa kún/ýaqytqa qaramastan jaramdy bolyp qalady. Sonymen qatar, FIFA osy ózgeristen týyndaıtyn kez kelgen máselelerdi sheshýge tyrysady», - dep málim etti FIFA.

Buǵan deıin chempıonattyń birinshi matchy 21 qarashada Senegal men Nıderland arasynda ótedi dep josparlanǵan. FIFA sheshiminen keıin bul match 21 qarasha saǵat 19:00-ge aýystyryldy, ıaǵnı Katar men Ekvador arasyndaǵy oıynǵa bólingen keshki ýaqytqa aýysty.

Eýrokýbok oıyndaryndaǵy sátsizdik

Bıyl fýtboldan eýrokýbok oıyndarynda elimizdiń atynan 4 komanda synǵa tústi. Degenmen olardyń eshqaısysy toptyq kezeńge shyǵa alǵan joq.

Osy aptada fýtboldan UEFA Konferentsııa lıgasy úshinshi irikteý satysynda «Tobyl» jáne «Qyzyljar» komandalary qarymta oıyndar ótkizdi. Atalǵan komandalar alǵashqy kezdesýinde qarsylastaryna 0:1 esebimen jol bergen edi.

Qarymta kezdesýde «Tobyl» Bosnııa jáne Gertsogovınanyń «Zrınskı» komandasymen 1:1, «Qyzyljar» Kıprdiń APOEL klýbymen 0:0 esebimen teń tústi.

Osylaısha qazaqstandyq komandalar qarsylastarynan jeńildi.

Eske salsaq, odan buryn Konferentsııa lıgasy ekinshi irikteý satysynda «Astana» jáne «Qaırat» jarys jolynan shyǵyp qaldy.

Shahmatshylar sheberlik kórsetti

Úndistannyń Chennaı qalasynda ótken Dúnıejúzilik shahmat olımpıadasyn qazaqstandyq erler jáne áıelder quramasy nátıjeli oıyn kórsetti. Elimizdiń shahmattan áıelder quramasy 162 komandanyń ishinen 8-shi orynǵa ıe boldy. Jalpykomandalyq esepte Úndistan shahmatshylary jeńimpaz atanǵan.

Atalǵan básekede elimizdiń atynan Jansaıa Ábdimálik, Bıbisara Asaýbaeva, Ksenııa Balabaeva, Gúlishan Nahbaeva, Nazerke Nurǵalı sekildi sportshylar qatysty.

Erler quramasy týrnırdi 188 komandanyń ishinde 20-shy orynmen aıaqtady. Bul básekede jalpy komandalyq esepte Ózbekstan erler quramasy birinshi orynǵa ıe boldy.

Elimizdiń erler quramasynda Álisher Súleımenov, Arystanbek Orazaev, Rınat Jumabaev pen Qazybek Nógerbek oıyn kórsetti.

Islamıadadaǵy qazaqstandyqtar jetistigi

Búgingi kúnderi Túrkııanyń Konıa qalasynda Islam yntymaqtastyǵy oıyndary ótip jatyr. Qazirgi deıin qazaqstandyq sportshylar 43 (13 altyn, 9 kúmis, 21 qola) medalmen jalpykomandalyq esepte besinshi orynda keledi.

Qazirge deıin sýǵa júzýshi Adelaıda Pchelıntseva, jeńil atlet Mıhaıl Lıvtın, aýyr atlet Zýlfııa Chınshanlo (59 keli), Arlı Chonteı (55 keli), áıelder kúresinen Elena Shalygına (65 keli) chempıon tuǵyryna kóterildi.

Al aýyr atlet Alekseı Chýrkın kúmis medal alsa, Ótepbergen Álıev qola júldege qol sozdy.

Sondaı-aq, sporttyq gımnastıkadan el quramasy atalǵan dodada 3 kúmis, 1 qola aldy.

Al taekvondodan 87 kelide Baýyrjan Hasenov, grek-rım kúresinen 55 kelide Amanǵalı Bekbolatov qola júldege qol jetkizdi.

Islam yntymaqtastyǵy oıyndary 2005 jyldan beri turaqty ótkizilip keledi. Bıyl besinshi márte jalaýyn jelbiretti.

Bıylǵy dodada 55 elden sportshylar keldi. Oıyndar 8 tamyzda bastaldy. Ol 18 tamyzda máresine jetedi.

Júldeli oryndarǵa talasamyz

Indor hokkeıden (jabyq ǵımarattaǵy hokkeı) elimizdiń erler jáne áıelder quramasy Azııa kýbogy oıyndarynda júldeli oryndarǵa talasady. Atalǵan jarys Taıland astanasy Bangkok qalasynda ótip jatyr.

Erler quramasy qaı orynǵa talasatyny búgin, 14 tamyzda Malaızııamen kezdesýden keıin anyqtalady. Sodan keıin bas júlde nemese úshinshi oryn úshin saıysqa túsetini belgili bolady.

Aıta ketsek, qazaqstandyq hokkeıshiler budan buryn Indonezııamen 4:4 esebimen teń tússe, Sıngapýrdy 6:1, Taıvandy 5:1, Taılandty 6:3 esebimen tize búktirdi. Taǵy bir kezdesýde Iranǵa 3:4 esebimen jol berdi.

Qazaqstandyq hokkeıshiler buǵan deıin Azııa kýbogynda 2014 jyly qola júldeger atansa, 2015, 2017, 2019 jyldarda kúmis medal aldy.

Al elimizdiń áıelder quramasy bıylǵy týrnırde qola júldege talasady. Bul kezdesýde 15 tamyzda Malaızııamen sheberlik baıqasady.

Buǵan deıin olar toptyq kezeńde Shrı-Lankany 13:0, Irandy 5:2 Taıvandy 6:0 esebimen tize búktirip, jartylaı fınalda Taılandqa 0:6 esebimen jol berdi.

Qazaqstandyq hokkeıshiler buǵan deıingi Azııa kýbogy oıyndarynda 2010, 2012, 2014, 2015. 2017, 2019 jyldarda Azııa kýbogynyń jeńimpazy atanǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT