Otandyq taýar: Aldaǵy jyldary birneshe kásiporyn salynady
2021 jylǵy 23 qarasha 09:44

Otandyq taýar: Aldaǵy jyldary birneshe kásiporyn salynady

NUR-SULTAN. QazAqparat – Elimizde otandyq taýar ónimi úlesin arttyrý maqsatynda aldaǵy jyldary birneshe jańa kásiporyn salyp, iske qosý josparlanyp otyr. Bul týraly QR Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda málim etti, dep habarlaıdy QazAqparat tilshisi.

«Otandyq taýarlardyń assortımentin keńeıtý maqsatynda jańa jobalardy iske qosý josparlanýda. Aıtar bolsaq, 2022 jyly Qyzylorda oblysynda qýaty 197,1 myń tonna bolatyn «Orda Glass LTD» tabaq shyny óndiretin zaýytty paıdalanýǵa berý josparlanǵan. Investıtsııa kólemi 42,1 mlrd teńgeni quraıdy. Bul jobany iske asyrý nátıjesinde ishki naryqtyń tabaq shynyǵa qajettiliginiń 98% óteıdi. Sonymen qatar 2023 jylǵa deıin sheteldik ınvestorlardyń (Shveıtsarııa, Túrkııa, Ózbekstan) qatysýymen keramıkalyq plıtkalar shyǵaratyn úsh jańa kásiporyn (jalpy jobalyq qýaty 21,5 mln sharshy metr) paıdalanýǵa beriledi», - dedi Beıbit Atamqulov.

Mınıstrdiń málimetinshe, atalǵan jańa jobalar ishki naryqtyń qajettiligin tolyq qamtamasyz etedi.

«Odan bólek, 2025 jylǵa deıin kaltsıılengen soda óndirý boıynsha taǵy jańa 2 kásiporyndy iske qosý josparlanyp otyr. Sonyń biri Jambyl oblysyndaǵy «Qazaq soda» JShS, qýaty 500 myń tonna jáne Pavlodar oblysyndaǵy «Pavlodar soda» JShS, qýaty 200 myń tonnany quraıdy», - deıdi ol.


Jańalyqtar

MURAǴAT