+7 (701) 759 90 19
USD 410.70 EUR 465.28
RUB 5.80 CNY 58.81
Jańalyqtar

«Osmannyń qurylýy» atty túrik serıalynda qobyz tartqan Erjanmen suhbat

2020 jylǵy 7 maýsym 11:51
Bólisińiz:
«Osmannyń qurylýy» atty túrik serıalynda qobyz tartqan Erjanmen suhbat

NUR-SULTAN. QazAqparat – Jaqynda Facebook-ta Túrkııa serıaldarynyń birinde dombyra men qobyz shertken eki adamnyń vıdeoúzindisi sharlap ketken bolatyn. Túriktiń áıgili aktery Býrak Ózjıvıt basty róldi somdaıtyn serıalda qobyz tartyp otyrǵan jigit – jańaqorǵandyq Erjan Arqabaı eken. Túrkııada júrgen otandasymyzben baılanysqa shyǵyp, Osman ımperııasynyń qurylý tarıhyn baıandaıtyn serıaldyń jobasyna qalaı kelgenin bilip kórgen edik.

Erjan Arqabaı Túrkııaǵa 2014 jyly magıstratýrada oqý úshin barǵan. Bir jyl ótkennen keıin Konıadaǵy Nedjımettın Erbakan ýnıversıtetine túsip, «halyq mýzykasy» bólimin byltyr bitirgen. Elordadaǵy Qazaq ulttyq óner ýnıversıtetiniń túlegi. Erjan Túrkııada júrgen kezde Arslanbek Sultanbekov atty noǵaı azamatymen tanysady. Arslanbektyń ol tusta «Dombyra» atty óleńi Túrkııada birshama tanymaldyqqa ıe bolyp turǵan kez. «Dombyra» ánin saıası partııalardyń ókilderi, tipti «Fenerbahche» fýtbol klýby da alańǵa shyrqap shyǵyp júrgen shaq.


Kóp ótpeı Erjan da qazaqtyń tarıhı kúılerinen quralǵan Dijital albomyn jaryqqa shyǵarypty.

Al Arslanbek pen Erjandy tarıhı serıalǵa túsýge «Bozdağ Film» kınostýdııasy shaqyrǵan eken.

2019 jyly atalǵan kınostýdııanyń tapsyrysymen 12 ánnen turatyn albom jazylǵan. Albomǵa Súgirdiń termesi de engizilgen.

«Bıyl Qazaqstanda bolǵan edim. Arslanbek aǵamyz qaıtadan Túrkııaǵa shaqyryp aldy. Endi qazir birlese jazǵan albomnyń klıpterin túsirip jatyrmyz. Ótkende Júnis Ámireniń «Jalǵan dúnıe» atty óleńine, odan keıin Ystanbuldyń alynýyna baılanysty klıpti de jaryqqa shyǵardyq. Teleserıal jumysyna osylaı birte-birte keldik. Albomda «Osman beı» atty án bar. Negizi ol ánniń túpnusqasy Asekeńniń óz týyndysy «Qosaı» dep oryndap júrgen bolatyn. Aqyry osy óleń teleserıalǵa engizildi. Óleń qobyz jáne dombyramen, sondaı-aq urmaly aspaptarmen oryndaldy», - deıdi Erjan Arqabaı.

«Osmannyń qurylýy» serıalyndaǵy basty róldi (Osman beı) túriktiń tanymal aktery Býrak Ózjıvıt somdaıdy. Kınogerler Erjan men Arslanbektiń dombyra men qobyzdyń únin úılestirip, Túrkııa kórermenin tań-tamasha qylyp jatqanyn kórip, bul mýzykalyq sıntezdi aldaǵy ýaqytta tarıhı serıaldardyń saýntregine jaratý kerektigin aıtyp jatqan kórinedi.


«Osyǵan deıin «Ertuǵyryl» serıaly túsirilip, ol álem elderimen birge Qazaqstanda da halyqtyń nazaryna ilingenin bilesizder. Endi Túrkııada jańa joba qolǵa alyndy. Osman ımperııasyn qurǵan Ertuǵyryldyń uly Osman beı jaıynda qazir serıal túsirilip jatyr. «Osmannyń qurylýy» teleserıaly sol kezeńdegi túrik halqynyń basynan ótken qıyndyqtar men jaýgershilik zamandy sıpattaıdy. Býrak Ózjıvıtpen qatty baılanysqa túse qoımadyq. Koronavırýs indetine baılanysty túsirilim barysynda da áleýmettik qashyqtyqty saqtap júrmiz. Serıal osydan bir apta buryn túsirilip, kóp ótpeı kórsetilimge berildi. Túsirilim tobynda birshama aktermen tanysyp úlgerdik. Mysaly, Aıaz degen róldi somdaıtyn Atıla Gıýzal grek-rım kúresiniń balýany bolǵan eken. Grek-Rım kúresi boıynsha halyqaralyq jarystardyń júldegeri ári dosym Nurmahan Tinálıev chempıonattardyń birinde Atılamen kúresken eken. Mine, osylaısha, ortaq dosymyzdy da taýyp aldyq», - degen Erjan serıaldyń qaı bóliginde oınaıtynyn da aıtyp berdi.

Erjan men Arslanbek «Osmannyń qurylýy» serıalyna Osman beıdi ulyqtaý toıyna arnaıy shaqyrylǵan jyraý retinde qatysady.

«Qobyz adamnyń ishki jan-dúnıesindegi sezimin bere alsa, dombyranyń ekpini rýhty asqaqtatady. Keshe Facebook-tegiparaqshama bir kisi «túriktiń serıalynda dombyra neǵyp júr» dep synı pikir qaldyrypty. Áıtse de, men bul pikirdi quptaı almaımyn. Nege deseńiz, dombyra – eki myń jyldan astam tarıhy bar aspap. Akademık Ahmet Jubanov bastaǵan aǵalarymyzǵa jáne osy ýaqytqa deıin qazaqtyń 5 myńǵa tarta kúıin saqtap qalǵan halyq kompozıtorlaryna, oryndaýshylaryna myń da bir rahmet. Máselen, basqa túbi bir túrik halqynyń ishinde mundaı murasyn qazaqtaı ǵasyrdan ǵasyrǵa jetkizgenderi neken-saıaq. Dombyrany bizdiń el qońyr kúıimen, dástúrli ánimen búgingi ǵasyrǵa deıin alyp keldi. Endi ulttyq aspabymyz túbi bir týystas elderdiń ortaq qundylyǵyna aınalyp kele jatyr. Qýaný kerek dep oılaımyn. Túrikterge dombyra jat emes. Munda ulttyq aspabymyzdy baǵlamanyń atasy dep biledi. Mysaly Eýropa jurty dombyrany túrikterdeı qabyldaı almasy anyq. Onyń sebebi – tekte», - deıdi ol.

Erjan Arqabaı Túrkııadaǵy qandastarymyzben jaqsy qarym-qatynasta. Mustafa Óztúrik aǵamyzdyń shákirtterimen tyǵyz baılanysta eken. Ondaǵy qazaq baýyrlarymyz Erjandy toıǵa shaqyryp kúı tartqyzyp, dombyranyń ásem ánimen sýsyndaıtyn kórinedi. Otandasymyz olardyń úıine qonaqqa da jıi baryp, qandastarmen baılanysty úzbeýge tyrysady.


Bizdiń kanalymyzǵa jazylyńyz:

Bólisińiz:

Avtor:

Aıan Bekenuly

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Bakytjan Erbasov
Bakytjan Erbasov
954-059
REDAKTOR
Janıbek Amangeldı
Janıbek Amangeldı
954-059

MURAǴAT