Óskemende kólikten jarty mıllıon teńge urlaǵan oqýshynyń áreketi kameraǵa túsip qalǵan
2021 jylǵy 2 jeltoqsan 16:22

Óskemende kólikten jarty mıllıon teńge urlaǵan oqýshynyń áreketi kameraǵa túsip qalǵan

ÓSKEMEN. QazAqparat – Óskemen qalasynda kólikten jarty mln teńge jymqyryp ketken mektep oqýshysy ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, «102» jedel arnasyna 29 jastaǵy azamat habarlasqan. Óz sózinde ol úıiniń aýlasynda esigi ashyq turǵan «VAZ» kóliginiń salonynan belgisiz bireýdiń 510 000 teńgesin urlap ketkenin jetkizdi.

«Oqıǵa ornyna jetken jedel-tergeý toby qylmyskerdiń saýsaq izderin alǵan. Sondaı-aq urlyq jasalǵan sát «Sergek» kamerasyna túsip qalǵan. Polıtseıler kúdiktini tapty. 15 jastaǵy mektep oqýshysynyń buǵan deıin de birneshe ret urlyq jasaǵany jáne qyrkúıekten bastap qalalyq Polıtsııa basqarmasynda esepte turǵany anyqtaldy», - dedi oblystyq PD bastyǵy Saǵat Mádıev.

Jasóspirim ájesimen birge turady. Al anasynyń túrmede jazasyn ótep jatqany belgili boldy. Qazirgi ýaqytta oqýshy ShQO bilim basqarmasynyń kámeletke tolmaǵandardy beıimdeý ortalyǵyna ornalastyryldy.

Jınalǵan materıaldar kámeletke tolmaǵandardyń isteri jónindegi komıssııada qaralady. Atalǵan fakti boıynsha QR QK-niń 188-baby 3-bóligi 3-tarmaǵyna (Urlyq) sáıkes sotqa deıingi tergeý amaldary bastaldy.


Uqsas jańalyqtar

Jańalyqtar

Úrdis

MURAǴAT