Óskemende kardıologııalyq ortalyq salynady

NUR-SULTAN. QazAqparat - Shyǵys Qazaqstannyń ákimi Danıal Ahmetov aımaqta medıtsına salasy qalaı damyp jatqanyn aıtty, dep habarlaıdy QazAqparat tilshisi.

Ákimniń aıtýynsha, aldaǵy jyldary Semeıdegi jedel medıtsınalyq kómek aýrýhanasy JCI halyqaralyq standartyna sáıkestendiriledi. Ol sondaı-aq, óńirdegi eldimekenderde kardıologııalyq ortalyqtar ashylyp jatqanyn atap ótti.

«Medıtsına sapasy - zamanǵa saı jabdyqtardy ıgerip, satyp alý, fılıaldardy ashyp, medıtsınalyq uıymdardyń halyqaralyq standartqa kóshirilýimen esepteledi. Sonymen qatar, biz tek jetekshi aımaqtyq klınıkalardy damytýdy maqsat tutyp otyrǵan joqpyz. Respýblıkada birinshi bolyp eki aýdan ortalyǵynda - Aıagóz ben Altaıda ınsýlt ortalyǵyn ashtyq. Turǵyndar aldymen jańa halyqaralyq standarttardyń ne ekenin kórdi. Tórt aıdyń ishinde biz sol eldimekenderde kardıologııalyq ortalyqtardy ashamyz. Artynsha Aıagóz men Altaıda shýntty operatsııalar jasalady», - dedi Shyǵys Qazaqstan oblysynyń ákimi OKQ-da ótken baspasóz máslıhatynda.

Danıal Ahmetov sonymen qatar, aımaqta Nur-Sultan men Almatyda ornalasqan jetekshi medıtsınalyq ortalyqtardyń fılıaldaryn ashý qajettigin atap ótti.

«Eki-úsh qaladaǵy joǵary tehnologııalyq ortalyqtarǵa súıenetin bolsaq, progressıvti medıtsınany damyta almaımyz. Biz Semeı qalasyndaǵy aýrýhanada travmatologııa ınstıtýtynyń fılıalyn uıymdastyrdyq. Óskemende kardıologııalyq ortalyq salýdamyz. Jaqyn arada Semeı qalasynda Neırohırýrgııa ınstıtýtynyń fılıaly ashylady», - dedi ákim.