Óskemende 30-ǵa jýyq avtovolonter muqtaj jandardy tegin tasymaldap júr
2022 jylǵy 28 mamyr 09:10

Óskemende 30-ǵa jýyq avtovolonter muqtaj jandardy tegin tasymaldap júr

ÓSKEMEN. QazAqparat – Qoǵamǵa qandaı da bir paıda ákelip, ózgege kómek qolyn sozý – eriktilerdiń maqsaty. Sol úshin qaıtarym kútpeıtin, aqsha suramaıtyn volonterlerdi el-jurt syılaıdy. Óskemen qalasyndaǵy múddeleri toǵysqan avtoeriktiler 4 jylǵa jýyq ýaqyt boıy muqtaj jandardy dittegen jerlerine jetkizip júr.

Aqysyz aparyp tastaıdy

«Óskemen-Asar» avtoeriktiler jobasy 2018 jyldan beri iske asyp keledi. Onyń qolǵa alynýyna qala ákimdigi muryndyq bolǵan. Qazir jobanyń operatory mindetin atqaryp júrgen Tatıana Dementevanyń aıtýynsha, ıgi iske atsalysyp, qoldaý tanytatyndar kúnnen kúnge kóbeıýde.

- Joba jaıly el-jurtqa estirtý úshin beınerolıkter túsirilip, áleýmettik jelilerge jarııalandy.

Sodan keıin múmkindigi shekteýli jandarǵa kómekteskisi keletin kóligi bar azamattar habarlasa bastady. Júrgizýshiler qatary kóbeıgen saıyn biz týraly biletinder sany artty, - deıdi ol.

Qazir uıymda 30-ǵa jýyq avtoerikti bar. Olar óz kólikterimen esh aqysyz tasymaldaıdy. Tek múmkindigi shekteýli jandardy ǵana emes, qart kisilerdi, kópbalaly otbasylardy da kerek jerlerine jetkizip tastaıdy.

- Ózim 15 jyl buryn ınsýlt alyp, sodan beri arbaǵa tańyldym. Osy joba jaıly estip, alǵashynda ózim habarlasyp, kómek suradym. Keıin jobaǵa qatysyp júrgen áıelder meni óz qatarlaryna shaqyrdy. Sóıtip, sońǵy 2 jyl boıy operator bolyp júrmin. Habarlasqan azamattar jaıly messendjerdegi topqa jazamyn. Qoly bos júrgizýshi sol jaqqa qaraı jol tartady. Jalpy aıtqanda, meniń mindetim – kómek suraıtyndar men eriktilerdi baılanystyryp otyrý, - deıdi Tatıana Dementeva.

Qatarlarynda áıelder de kóp

Rasymende múgedektigi bar adamdy ońaltý sharalarynan ótkizý úshin medıtsınalyq mekemelerge aparǵan saıyn taksı shaqyryp otyrý qaltaǵa biraz salmaq túsiredi. Al osy eriktilerdiń arqasynda olar aqshalaryn únemdep, basqa kerek-jaraǵyna, dári-dármekke jumsaı alady.

- Aı saıyn shamamen 15-20 adamǵa kómek kórsetiledi. Keıde az, keıde kóbirek. Avtoeriktiler demalys ýaqytynda da qolushyn sozýǵa ázir. Qatarymyzda áıelder de kóp. Jalpy kez kelgen adam qosyla alady. Nıet bildirýshilerdi jobaǵa shaqyramyz, - deıdi joba operatory.

Volonterler qala ishinde kez kelgen jerge aparyp tastaıdy. Biraq irgedegi shaǵyn aýdandarǵa jetkizý jaǵy qıyndaý. Avtoeriktilerdi shaqyrǵysy kelgen jandar olardyń áleýmettik jelilerdegi paraqshasyna jazyp nemese 8(747) 911-00-11 telefon nómiri arqyly habarlasa alady.

Eriktilerdiń biri – Olga Mıller. Jobaǵa atsalysyp júrgenine 3 jyldan asqan. Kóligi – Toyota Prado 150.

- Bireýge paıdańdy tıgizý, alǵysyn alý – erekshe sezim. Osy jobaǵa qosylǵanyma qýanamyn. Bir múmkindigi shekteýli qyzdy jıi tasymaldaımyn. Ol kólikten shyǵarda maǵan qarap kúlimdeıdi. Mine, munyń ózi maǵan zor qýanysh. Jıi habarlasatyn azamattarmen jaqyn tanysyp, aralasyp ta kettik, - deıdi ol.


Uqsas jańalyqtar

Jańalyqtar

MURAǴAT