Jańalyqtar  >

Órtten zardap shekken qostanaılyqtardyń balalaryna arnalǵan balabaqshanyń qurylysy bastaldy

2022 jylǵy 30 qarasha, 03:18
Órtten zardap shekken qostanaılyqtardyń balalaryna arnalǵan balabaqshanyń qurylysy bastaldy

QOSTANAI. QazAqparat – Bıyl Qostanaı oblysy Áýlıekól aýdanyndaǵy órtten zardap shekkenderge arnap salynǵan baspanalardyń mańynan boı kóteretin balabaqshanyń qurylysy bastaldy.

Bul týraly óńir ákimi Arhımed Muhambetov óziniń áleýmettik jelidegi paraqshasynda jazdy, dep habarlaıdy QazAqparat tilshisi.

«Áýlıekól selosyna qarasty «Birlik» shaǵyn aýdanyndaǵy balabaqsha qurylysyn bastaýǵa ruqsat berdim. Joba boıynsha bilim oshaǵynyń jalpy aýdany 4 myń sharshy metrden asady. Nysan 280 orynǵa shaqtalǵan. Joba «Halyq» qaıyrymdylyq qory esebinen 1,3 mlrd teńgege júzege asyrylýda. Balabaqsha sabaqtar men oıyndardy ótkizýge múmkindik beretin zamanaýı jıhazdarmen jáne qurylǵylarmen jabdyqtalady. Sondaı-aq, balabaqshada mýzyka jáne sport zaly, ádistemelik jáne medıtsınalyq kabınetter bolady. Ǵımaratta barlyq jaǵdaı qarastyrylady. Nysandy 2023 jyly kúzde paıdalanýǵa berý josparlanǵan», - dep jazdy óńir ákimi óziniń Іnstagram paraqshasynda.

Oblys basshysynyń málimetinshe, Amanqaraǵaı aýylynda feldsherlik-akýsherlik pýnkt ashylǵan. Ony bıyl órtten zardap shekkenderge kómek kórsetý maqsatynda elimizdegi jaýapkershiligi shekteýli seriktestikterdiń biri óz qarajatyna salǵan. Feldsherlik-akýsherlik pýnkt bir aýysymda 50 adamdy qabyldaýǵa qaýqarly. Ol 2 aı ishinde salynǵan.

Eske salaıyq, bıyl qyrkúıekte Qostanaı oblysyna qarasty Áýlıekól aýdanynda alapat órt bolyp, 2 091 adam evakýatsııalanyp, 12 turǵyn túrli jaraqat alǵan edi. Munymen qosa, tilsiz jaý saldarynan 1935 jyly týǵan bir adam kóz jumdy.

Qostanaı oblysynyń ákimi Arhımed Muhambetovtyń málimetinshe, Áýlıekól aýdanyndaǵy ormannyń basym bóligi kúlge aınalǵan.

Baspanalary janyp ketken turǵyndarǵa arnap 91 úı salynyp, olar taıaýda paıdalanýǵa berildi.


Uqsas jańalyqtar
Tegı:
Seriktester jańalyqtary

Jańalyqtar