+7 (701) 759 90 19
USD 428.05 EUR 501.2
RUB 5.47 CNY 63.87
Jańalyqtar

Ortasha kórsetkish – 64 ball: Qazaqstanda UBT aıaqtaldy

2020 jylǵy 2 shilde 19:35
Bólisińiz:
Ortasha kórsetkish – 64 ball: Qazaqstanda UBT aıaqtaldy

NUR-SULTAN. QazAqparat – QR Bilim jáne ǵylym mınıstrligi 2020 jylǵy kezekti Ulttyq biryńǵaı testileý qorytyndysyn jarııalady, dep habarlaıdy QazAqparat.

Kezekti UBT elimiz boıynsha 21 maýsym men 1 shilde aralyǵynda ótkizildi. Oǵan rekordtyq kólemde – 131 754 ótinish tirkelse, onyń 111 113-i, ıaǵnı 82 paıyzy – bıylǵy mektep túlekteri. Ótken jyly bul kórsetkish 12% tómen bolǵanyn atap ótken jón.

2020 jyly Ulttyq biryńǵaı testileý 161 pýnktte júrgizildi. Testileýdiń ádil ótý barysyn qadaǵalaý maqsatynda qalalar men óńirlerge Bilim jáne ǵylym mınıstrligi tarapynan 1 983 ókil jiberildi. Sonymen birge, UBT barysyn Sybaılas jemqorlyqqa qarsy agenttik, Úkimettik emes uıym, BAQ, «Adaldyq alańy» jobalyq keńseleriniń ókilderi men qoǵam belsendileri bar Arnaıy monıtorıngtik top (510 adam) baqylady.

UBT qorytyndysy boıynsha, testileýge tirkelgen azamattardyń 92,1% testileýge qatysty, 2019 jyly bul kórsetkish 94% quraǵan bolatyn. Shekti baldy 82 154 talapker jınady, bul ótken jylǵy kórsetkishtermen salystyrǵanda bir deńgeıde qalyp otyr. Jalpy respýblıka boıynsha ortasha kórsetkish 64,06 baldy qurady, munda 2019 jylǵy ortasha kórsetkishpen salystyrǵanda aıtarlyqtaı aıyrmashylyq joq (65,5 ball).

Bıylǵy testileýde alǵash ret elektrondyq úkimet bazasy arqyly Face ID júıesi paıdalanyldy, osyǵan baılanysty UBT tapsyrýǵa basqa adamnyń kirýge árekettenýi aıtarlyqtaı tómendedi. Máselen, bıyl 7 mektep túlegi óz ornyna UBT-ǵa basqa adamdy jibermek bolǵan, ótken jyly dál osyndaı 34 jaǵdaı oryn alǵan edi.

119 talapker densaýlyǵyna baılanysty UBT tapsyrmady. Olar úshin basqa kúnderi, ıaǵnı 19 shildege deıin testileý uıymdastyrylatyn bolady.

Sonymen birge, bıyl alǵash ret talapkerlerge kalkýlıatorlar paıdalanýǵa ruqsat etildi. Testileý ýaqyty uzartylyp, túlekter qorytyndy mektep emtıhandarynan bosatyldy.

UBT júrgizilgen ár aýdıtorııa arnaıy beınebaqylaý kameralarymen jabdyqtalǵan bolatyn, nátıjesinde 9,5 mln-nan astam adam UBT barysyn onlaın rejımde baqylady. Endi erejege sáıkes 2020 jylǵy 25 tamyzǵa deıin beınejazbalar jiti tekseriledi. Eger beınejazbada grant ıelengen talapkerdiń tyıym salynǵan zattardy paıdalanǵany anyqtalsa, testilenýshiniń UBT nátıjesi joıylady jáne granty qaıtarylady.

Elimizdiń barlyq UBT ótkizý beketterinde saqtyq sharalary qolǵa alynyp, medıtsınalyq-sanıtarlyq normalar qatań saqtaldy. Árbir UBT-ǵa qatysýshy dezınfektsııalaýdyń 5 kezeńinen ótti: dezınfektsııalyq ótkelderden ótip, arnaıy kilemshede aıaq kıimderin zararsyzdandyrdy, dene qyzýyn ólshetip, qoldaryn zararsyzdandyrý suıyqtyǵymen óńdedi jáne birneshe medıtsınalyq maska aldy.

Testileýge kirgizý jáne otyrǵyzý kezinde talapkerler arasynda eki metr araqashyqtyq saqtaldy. Árbir aýdıtorııa bakterıtsıdtik quraldarmen jáne aýa retsırkýlıatorlarymen jeldetildi jáne tazartyldy. Aýdıtorııalar 35% deıin toltyryldy, árqaısysynda tek 10-18 adam otyrdy. Ótken jyly bir aýdıtorııada orta eseppen 50 talapker bolǵan edi. Jalpy, maýsym aıyndaǵy Ulttyq biryńǵaı testileý qalypty rejımde ótti.

Eske sala keteıik, kelesi UBT tamyz aıynda ótedi, onda talapker shektik ball jınasa, JOO-nyń aqyly bólimine oqýǵa túse alady.

Sonymen birge, JOO aqyly bólimine túsý úshin qańtar aıyndaǵy UBT sertıfıkattary da jaramdy bolyp qala beredi.


Bizdiń kanalymyzǵa jazylyńyz:

Bólisińiz:

Avtor:

Aıjan Serikjanqyzy

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Jarylqasyn Saıagúl
Jarylqasyn Saıagúl
954-059

MURAǴAT