Ortalyq referendým komıssııasy bıýlletenderdi daıyndaýǵa qatysty qaýly qabyldady
2022 jylǵy 17 mamyr 13:04

Ortalyq referendým komıssııasy bıýlletenderdi daıyndaýǵa qatysty qaýly qabyldady

NUR-SULTAN. QazAqparat - Referendým bıýlletenderi 28 mamyrǵa deıin daıyn bolady. Bul týraly elordada Ortalyq referendým komıssııasynyń otyrysynda málim boldy, dep habarlaıdy QazAqparat tilshisi.

«Respýblıkalyq referendým týraly» QR Konstıtýtsııalyq Zańynyń 27-babyna sáıkes, daýys berýge arnalǵan bıýlletenderdi daıyndaý tártibin Ortalyq referendým komıssııasy belgileıdi. Ýchaskelik referendým komıssııalary daýys beriletin kúnnen keminde jeti kún buryn bıýlletendermen qamtamasyz etiledi», - dedi QR Ortalyq saılaý komıssııasynyń hatshysy Muhtar Erman.

Taratylǵan málimetke qaraǵanda, Konstıtýtsııalyq zańda belgilengen tártippen respýblıkalyq referendýmǵa qatysýǵa quqyǵy bar azamattardyń tizimderi referendým komıssııasyna usynylyp, tıisti ákimniń qoly qoıyldy.

«Oblystardyń, Nur-Sultan, Almaty, Shymkent qalalary ákimdikteriniń, respýblıka boıynsha jergilikti atqarýshy organdardyń ókilderi usynǵan málimetter men esepterge sáıkes, tizimderge 11 722 536 adam engizildi. 2022 jylǵy 5 maýsymǵa taǵaıyndalǵan respýblıkalyq referendým ótkizý kezinde daýys berýge arnalǵan bıýlletenderdi daıyndaýdyń keıbir máseleleri týraly» Ortalyq referendým komıssııasynyń qaýlysymen daýys berýge arnalǵan bıýlletender bir paıyz rezervpen referendýmǵa qatysýǵa quqyǵy bar azamattardyń tizimine engizilgen sanǵa teń mólsherde daıyndalady dep belgilengen. Demek, 11 839 761 kóleminde daýys berýge arnalǵan bıýlleten shyǵarylýy tıis», - dedi OSK hatshysy.

Onyń aıtýynsha, belgilengen mólsherde daýys berýge arnalǵan bıýlletenderdi daıyndaý jáne referendým ýchaskelerine zańnamada kózdelgen merzimde jetkizý oblystyq, respýblıkalyq mańyzy bar qalalar men elordanyń referendým komıssııalaryna tapsyrylady.

Aýmaqtyq referendým komıssııalary bıýlletenderdi referendým ýchaskelerine jetkizý úshin belgilengen mólsherde daýys berýge arnalǵan bıýlletenderdi daıyndaýdy 2022 jylǵy 28 mamyrǵa deıin qamtamasyz etýge tıis.

Osy oraıda búgin, Ortalyq referendým komıssııasynyń «2022 jylǵy 5 maýsymǵa taǵaıyndalǵan respýblıkalyq referendým ótkizý kezinde daýys berýge arnalǵan bıýlletenderdiń sanyn belgileý týraly» qaýlysy qabyldandy.

Budan buryn habarlanǵandaı, Qazaqstanda 10 013 referendým ýchaskesi iske qosylady.


Seriktester jańalyqtary

Jańalyqtar

Úrdis

MURAǴAT