Ortalyq Azııa elderinde qazaqstandyq JOO fılıaldary ashylýy múmkin
2022 jylǵy 14 mamyr 11:32

Ortalyq Azııa elderinde qazaqstandyq JOO fılıaldary ashylýy múmkin

NUR-SULTAN. QazAqparat – Ortalyq Azııa elderi rektorlarynyń forýmynda birqatar másele kóterildi, sonyń biri - joǵary oqý oryndarynyń fılıaldaryn ashý múmkindigi. Bul týraly QR Bilim jáne ǵylym mınıstri Ashat Aımaǵambetov áleýmettik jelidegi paraqshasynda jazdy, dep habarlaıdy QazAqparat.

«Bul - byltyr qol qoıylǵan Túrkistan deklaratsııasynda kórsetilgen josparlardy júzege asyratyn forým. Negizgi maqsat – óńirlik deńgeıde yntymaqtastyqty nyǵaıtyp, aımaqta birtutas keńistik qurýǵa múmkindik beretin Ortalyq Azııa joǵary bilim aımaǵyn qurý», - dep jazady mınıstr.

Vedomstvo basshysy atap ótkendeı, bıyl Qazaqstan Chehııamen birge Bolon protsesin Basqarý tobyna (BFUG) teń tóraǵalyq etip jatyr.

«Búgin biz Qazaqstanda BFUG ókildigin ashý máselesin kóterdik. Bul Eýropa men Ortalyq Azııa elderi arasyndaǵy joǵary bilim salasyndaǵy áriptestikti kúsheıtýge jáne Bolon protsesi qaǵıdattaryn óńirde taratýǵa múmkindik beredi», - deıdi Ashat Aımaǵambetov.

Atalǵan forým jumysyna mınıstrlikter ókilderi, sondaı-aq Ortalyq Azııa elderi ýnıversıtetteriniń 133 ókili qatysqan.

Vedomstvo basshysynyń habarlaýynsha, forým qorytyndysynda Ortalyq Azııa JOO-larynyń alıansyn qurý týraly memorandým qabyldandy. Qazaqstan, Qyrǵyzstan, Ózbekstan jáne Tájikstan ýnıversıtetteri arasynda ekijaqty kelisimderge qol qoıyldy.

Sondaı-aq, Ortalyq Azııa elderinde qazaqstandyq joǵary oqý oryndarynyń fılıaldaryn ashý múmkindigi talqylanǵan. Ár memleket úshin basym baǵyttar boıynsha birlesken ǵylymı jáne bilim berý jobalaryn ázirleý jospary ázirlendi.

«Ýnıversıtetter óz arasynda oqytýshylar jáne stýdenttermen almasady. Bul baǵytta biz «ál-Farabı» atyndaǵy stıpendııalyq baǵdarlamany iske qosyp, Ortalyq Azııa elderiniń azamattaryna kvota bólýge daıynbyz», - dep túıindeıdi mınıstr.

Buǵan deıin habarlanǵanyndaı, qazaqstandyq JOO-lar oqý baǵdarlamalaryn ózderi ózgertedi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT