Oraz Jandosov Tsıfrlyq damý mınıstrine shtattan tys keńesshi boldy
2022 jylǵy 23 mamyr 14:15

Oraz Jandosov Tsıfrlyq damý mınıstrine shtattan tys keńesshi boldy

NUR-SULTAN. QazAqparat - Ekonomıst Oraz Jandosov Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınniń shtattan tys keńesshisi bolyp taǵaıyndaldy, dep habarlaıdy QazAqparat.

Bul jaıynda Baǵdat Mýsın óziniń áleýmettik jelidegi paraqshasynda málim etti.

«Qazirgi zamanda tsıfrlandyrý barlyq salalardy qamtyǵan. Ár salany saralap, bul baǵyt boıynsha qansha derek tsıfrlyq nusqada jınaqtalatynyn jáne qanshasyn júıeleý qajettigin aıqyndaý kerek. Bul - data driven government-ke kóshý jolyndaǵy negizgi talap. Mysaly, geologııadaǵy aqparattyń tsıfrlyq nusqasyn alaıyq. Tonnalaǵan qaǵazdar skanerlendi, biraq ondaǵy maǵlumattardy túsiný qıyn, sondyqtan osy geologııalyq derekterdi «sóreler» boıynsha retteıtin tıisti baza qajet» dep jazady mınıstr.

Onyń aıtýynsha, mundaı jumys ár sala boıynsha atqarylyp, jiktelip, ózekti derekter usynatyn durys protsester qurylýy kerek.

Bul turǵyda mınıstrlik túrli ekonomıkalyq saladaǵy qoǵam belsendilerimen tyǵyz jumys isteýi tıis. Keıde mańyzdy sheshim qabyldaý úshin tájirıbeli kisilerdiń keńesi qajet bop jatady.

«Maǵan kez kelgen sátte konsýltatsııa beretin asa tájirıbeli, ózim arqa súıeıtin kisilerdiń biri - Oraz Álıuly Jandosov. Onymen Qazposhtada jumys istegende tanysqan bolatynmyn, ol kezde táýelsiz dırektor bolatyn jáne Dırektorlar keńesiniń tóraıymy Elena Leonıdovna Bahmýtovamen birge maǵan tájirıbelik turǵyda kóp qoldaý kórsetip, baǵyt-baǵdar jasaǵan edi. Sonda qurylǵan korporatıvtik basqarýdyń saýatty júıesin osynda, ıaǵnı TsDIAÓM-de engizgim keledi. Sondyqtan men ekonomıka salasynyń maıtalmany Oraz Jandosovqa shtattan tys keńesshi bolýǵa usynys jasadym. Usynysymdy qabyl alǵanyńyz úshin alǵys aıtamyn» deıdi Baǵdat Mýsın.

Uqsas jańalyqtar

Jańalyqtar

MURAǴAT