Oralda salynyp bitpegen tergeý ızolıatory ǵımaraty ınvestorlarǵa usynyldy
2022 jylǵy 29 maýsym 14:55

Oralda salynyp bitpegen tergeý ızolıatory ǵımaraty ınvestorlarǵa usynyldy

ORAL. QazAqparat – Oralda salynyp bitpegen tergeý ızolıatory ǵımaraty ınvestorlarǵa usynyldy, dep habarlaıdy QazAqparat tilshisi.

Oblys ákimi Ǵalı Esqalıevtiń Feısbýktegi paraqshasynda jazǵanyndaı , atalmysh ǵımarattyń aýdany – 35 myń sharshy metr.

Ákimniń málim etkenindeı, Oral qalasynda 1500 adamǵa arnalǵan tergeý ızolıatorynyń qurylysy 2013 jyly bastalǵan bolatyn. Búginde nysan 90 paıyzǵa daıyn. Ǵımarattyń balanstyq quny shamamen 5,2 mlrd teńgeni quraıdy.

Jer teliminiń jalpy aýdany – 11,8 ga. Osy aýmaqta ákimshilik ǵımaraty, jataqhanalar, sport zaly, garajdar, kúzet bólmeleri, sheberhanalar, kókónis qoımasy, ashana, qazandyq jáne basqa. nysandar ornalasqan. Infraqurylym 90 paıyzǵa aıaqtalǵan.

Batys Qazaqstan Reseıdiń bes jáne Qazaqstannyń eki oblysymen shektesedi. Oral qalasynan 700 shaqyrym radıýsta 20 mıllıonǵa jýyq adam turady.

«Biz atalǵan nysandy kez kelgen baǵyttaǵy bızneske berýge daıynbyz. Ásirese, áleýmettik baǵyttaǵy jobalardy qoldaımyz (medıtsınalyq ortalyq, shaǵyn bıznes úshin ınkýbator, jastar qalashyǵy jáne t.b.).

Nysan ınvestorǵa jeńildikti sharttarmen, ıaǵnı, tólem merzimin uzartý arqyly jáne ulttyq valıýtamen beriledi.

Sondaı-aq biz memlekettik-jekeshelik áriptestik arqyly usynystardy da qarastyrýǵa ázirmiz. Ol jaǵdaıda nysannyń somasy ınvestor tarapynan ótelmeı, ınvestordyń jobasyndaǵy memlekettiń úles shotyna túsedi. Sonymen qatar memleket jobalyq qyzmetterdi tutynýshy retinde qoldaı alady (medıtsınalyq qyzmetter, bilim berý qyzmetterin jan basyna shaqqandaǵy qarjylandyrý jáne t.b.)», dep jazdy Ǵ.Esqalıev.

Osy usynysqa qyzyǵýshylyq bildirgen kásipkerler óńir basshysynyń jeke WhatsApp nómirine +77017776037, «Investor» degen belgimen óz usynystaryn joldaı alady.


Uqsas jańalyqtar

Jańalyqtar

Úrdis

MURAǴAT