Oral túrmesinde tóbeles bolyp, 10 adam jaraqat aldy
2022 jylǵy 13 mamyr 11:44

Oral túrmesinde tóbeles bolyp, 10 adam jaraqat aldy

ORAL. QazAqparat – Oralda túrmede jazasyn óteýshiler tóbelesip, 10 adam jaraqat aldy, dep habarlaıdy QazAqparat tilshisi.

BQO boıynsha qylmystyq-atqarý júıesi departamentiniń baspasóz qyzmeti málim etkenindeı, oqıǵa 10 mamyr kúni shamamen saǵat 05.00-de qaýipsizdigi ortasha RÝ-170/2 mekemesinde boldy.

Mekeme jataqhanasynda jazasyn óteýshiler bir-birimen sózge kelip, sońy buzaqylyq áreketke ulasqan. 10 mınýt ishinde kezekshi jasaqtyń kúshimen tóbeles toqtatylǵan. Barlyq qatysýshylarǵa alǵashqy medıtsınalyq járdem kórsetilip, oblystyq kópbeıindi aýrýhanaǵa jetkizilgen. Jazasyn óteýshilerdiń ómirine qaýip joq.

«Atalǵan derek boıynsha Oral qalasy polıtsııa basqarmasy Zachagan polıtsııa bólimi qyzmetkerlerimen QR QK 107-baby 2-bóligine (densaýlyqqa qasaqana aýyrlyǵy ortasha zııan keltirý) sáıkes sotqa deıingi tergeý amaldary júrgizilýde. Kúni búgin jazasyn óteýshiler tarapynan aryz-shaǵym túsken joq. Qyzmettik tekserý taǵaıyndaldy», dep habarlady vedomstvodan.

BQO polıtsııa departamentiniń baspasóz qyzmetinen túsken málimetke qaraǵanda, oqıǵa saldarynan jaraqat alǵan 1985 jylǵy jazasyn óteýshi dáriger qaraǵannan keıin oblystyq aýrýhananyń jansaqtaý bólimine jatqyzylǵan. 1992 jáne 1988 jylǵy jazasyn óteýshiler dárigerler qaraǵannan keıin keri qaıtarylǵan. Oqıǵa ornynan uzyndyǵy 1 metr 6 dana metall turba, uzyndyǵy 1 metr 3 dana aǵash taıaq, qara-qońyr daqtar alynǵan.

BQO densaýlyq saqtaý basqarmasynyń naqtylaýynsha, barlyǵy 10 adam jaraqat alǵan. Olardyń ekeýi medıtsınalyq kómekten bas tartty. Jeteýi qalalyq kópbeıindi aýrýhanaǵa jetkizildi. Kómek kórsetilgennen keıin otyrǵan jerlerine qaıtaryldy. Tómengi jaq súıegi synǵan bir adam oblystyq aýrýhanaǵa jatqyzyldy.



Uqsas jańalyqtar

Jańalyqtar

Úrdis

MURAǴAT