Jańalyqtar  >

Ońtústik Koreıa Qazaqstanǵa AES jobasymen birge otyn tsıkly tehnologııasyn berýge daıyn

2022 jylǵy 28 qarasha, 11:23
Ońtústik Koreıa Qazaqstanǵa AES jobasymen birge otyn tsıkly tehnologııasyn berýge daıyn

ASTANA. QazAqparat – «Qazaqstandyq atom elektr stantsııalary» JShS bas dırektory Tımýr Jántikın Qazaqstanǵa qaı eldiń AES reaktoryn ornatqanda ózimizdiń ýrandy otyn retinde paıdalanýǵa bolatynyn aıtty, dep habarlaıdy QazAqparat tilshisi.

«Elimizdiń shyǵysyndaǵy ÚMZ zaýytynda ýran untaqtary men tabletkalaryn óndirý tájirıbesi bar. Sondaı-aq, ótken jyldan bastap biz ıadrolyq reaktorǵa júkteletin ıadrolyq otynnyń sońǵy túri sanalatyn jylý shyǵaratyn qondyrǵylardy óndirýdi bastadyq jáne bul jylý shyǵaratyn qondyrǵylardy (ıadrolyq otyn) Qytaıdaǵy atom elektr stantsııalaryna jetkizemiz. Eger qytaılyq CNNC kompanııasy tańdalǵan jaǵdaıda, ózimizdiń ıadrolyq otyndy paıdalanýǵa berý máselesin qarastyrýǵa bolatyny anyq», - dep jazady Tımýr Jántikın QazAqparat saýalyna joldaǵan jaýabynda.

Al koreıalyqtar reaktor jobasymen birgen oǵan qajetti otyn óndirý tehnologııasyn da berýge daıyn kórinedi.

«ıAdrolyq-energetıkalyq tehnologııalardy jetkizýshini tańdaý kezinde Fýkýsımadan keıingi talaptardy eskere otyryp, ıaǵnı short-paraqta kórsetilgen vendordlardyń (KHNP, EDF, Rosatom, CNNC) – stantsııanyń qaýipsizdigi, eksplýatatsııa jáne jańa stantsııalardy salý tájirıbesi, kadrlardy daıarlaý múmkindikteri, oqshaýlaý dárejesi, normatıvtik baza jáne qujattama daıarlyǵy sııaqty birqatar negizgi kórsetkishteri qarastyrylady. Osy qarastyrylyp otyrǵan reaktorlardyń jumys istep turǵan prototıpteri bar nemese Atom energııasy jónindegi halyqaralyq agenttiktiń «tekserilgen tehnologııalar» anyqtamasyna sáıkes keletin, naryqta usynylǵan reaktorlyq tehnologııalar alyndy. Sondaı-aq, qandaı da bir vendordy tańdaǵan kezde AES-ti qazaqstandyq otynmen qamtamasyz etý jáne oǵan qyzmet kórsetý máselesi boıynsha talaptar qaralyp jatyr. Máselen, koreıalyq KHNP kompanııasy usynyp otyrǵan reaktorlardyń qujattar jınaǵynda ıadrolyq otyn tsıkly boıynsha tehnologııanyń usynysyn berýge daıyn ekenin habarlap otyr», - dep jazylǵan «Qazaqstandyq atom elektr stantsııalary» JShS bas dırektorynyń jaýabynda.


Uqsas jańalyqtar
Tegı:
Energetıka   AES   atom   Ýran  
Seriktester jańalyqtary

Jańalyqtar