Jańalyqtar  >
Óńirler jolaýshylar tasymalyn sýbsıdııalaýǵa qarajat tapshy ekenin málimdedi
2022 jylǵy 10 tamyz 20:23

Óńirler jolaýshylar tasymalyn sýbsıdııalaýǵa qarajat tapshy ekenin málimdedi

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Kólik komıteti tóraǵasynyń orynbasary Altaı Sembekuly qalalarda jolaýshylar tasymaly salasynda áleýmettik mańyzdaǵy baǵdarlardy sýbsıdııalaý problemalaryn aıtty, dep habarlaıdy QazAqparat tilshisi.

«Jolaýshylar tasymalyndaǵy qaýipsizdik, qyzmet sapasy, parkti jańartý jumystary baǵdarlardy sýbsıdııalaý máselesine tikeleı baılanysty. Áleýmettik mańyzdaǵy baǵdarlar boıynsha tasymaldaýshylardyń shyǵyndaryn sýbsıdııalaý jergilikti atqarýshy organdardyń mindetine jatady. Bul másele boıynsha 2020 jyly Úkimet qaladaǵy jolaýshylar tasymalyn damytý jónindegi sharalar keshenin bekitti», - dedi A. Sembekuly mınıstrlikte ótken keńeste.

Onyń aıtýynsha, sońǵy 4 jylda sýbsıdııalaý somasy bes ese ósip, 102 mlrd teńgeni qurady. Degenmen bul qarajattyń 80 paıyzǵa jýyǵy tek Nur-Sultan, Almaty, Shymkent qalalaryna ǵana tıesili boldy. Sonymen qatar, sýbsıdııanyń jalpy kólemindegi 1,2 paıyzy Almaty, Jambyl jáne Mańǵystaý oblystarynyń úlesinde.

«Sýbsıdııanyń 18 paıyzy qalǵan 14 óńirge tıesili. Sońǵy jyldary sýbsıdııa somasynyń artýyn tek respýblıkalyq mańyzdaǵy qalalar men elorda esebinen qamtamasyz etilip otyr. Óńirlerdiń málimetinshe, atalǵan salany tıisti qarajat somasymen sýbsıdııalaýǵa jergilikti bıýdjet jetkiliksiz», - dedi komıtet ókili.

Osy oraıda ol mınıstrlikke jergilikti atqarýshy organdar sýbsıdııa boıynsha qajetti somany rastaıtyn naqty qujattardy usynbaı jatqanyn aıtty.

«Mundaı aqparat berilse, biz bólingen qarajatty esekere otyryp, tapshylyq somasyn aıqyndar edik. Bul óz kezeginde jergilikti bıýdjetten bólinetin qarajatqa taldaý jasaýǵa múmkindik beredi. Munymen qosa, áleýmettik avtobýs baǵdarlary boıynsha tıisti jumystardy júrgizbeı otyrǵan óńirlerdi anyqtaýǵa múmkin bolady», - dedi Altaı Sembekuly.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT